काठमाडाैं- निर्वाचन आयोगले निर्वाचनमा खटिने सबै कर्मचारीका लागि भत्तादेखि बिमासम्मका विभिन्न सुविधा उपलब्ध गराउने व्यवस्था गरेको छ । आयोगका अनुसार निर्वाचनमा खटिने प्रत्येक कर्मचारीलाई जनही २० लाख रुपैयाँको बिमा सुविधा प्रदान गरिनेछ ।
मतदान केन्द्र तथा सुरक्षा अनुगमन घुम्ती टोलीमा खटिने कर्मचारीलाई दैनिक भत्तासमेतको व्यवस्था गरिएको छ । भत्ताअनुसार मतदान अधिकृतले दैनिक २ हजार ५ सय रुपैयाँ, सहायक मतदान अधिकृतले २ हजार रुपैयाँ, सहायक कर्मचारीले १ हजार ६ सय रुपैयाँ तथा सहयोगी कर्मचारी र स्वयंसेवकले जनही १ हजार २ सय रुपैयाँ पाउनेछन् ।
निर्वाचन आयोग, आयोगअन्तर्गतका ७७ कार्यालय र १६५ निर्वाचन अधिकृतको कार्यालयमा खटिने कर्मचारीका लागि सुरु तलब स्केलको शतप्रतिशतसम्म निर्वाचन सुविधा उपलब्ध गराइने आयोगले जनाएको छ । अतिरिक्त समयमा काम गर्ने कर्मचारीका लागि खाजा–खाना खर्चसमेतको व्यवस्था गरिएको छ ।
