काठमाडौँ । भारतले लिपुलेक क्षेत्रसम्बन्धी विवादका विषयमा नेपालसँग कूटनीतिक संवाद गर्न आफूहरू तयार रहेको स्पष्ट गरेको छ। भारतीय विदेश मन्त्रालयले नियमित साप्ताहिक पत्रकार सम्मेलनमार्फत यस्तो धारणा सार्वजनिक गरेको हो।
मन्त्रालयका प्रवक्ता रणधीर जैसवालले कैलाश मानसरोवर यात्राको मार्ग सन् १९५४ देखि प्रयोगमा रहेको उल्लेख गर्दै यस विषयमा नेपालले प्रस्तुत गरेको दाबी स्वीकार्य नभएको टिप्पणी गरेका छन्। उनका अनुसार यस विषयलाई एकतर्फी रूपमा व्याख्या गर्नु उचित नहुने भारतको धारणा रहेको छ।
उनले नेपाल-भारतबीचका अन्य सीमा तथा द्विपक्षीय विषयहरूमा पनि छलफलमार्फत समाधान खोज्न सकिने बताउँदै संवादका लागि भारत सधैँ खुला रहेको स्पष्ट पारे।
सीमा विवादजस्ता संवेदनशील विषयमा एकपक्षीय दाबीभन्दा वार्ता र सहमतिमा आधारित प्रक्रिया उपयुक्त हुने उनको भनाइ थियो।
