काठमाडौँ । सुदूरपश्चिम प्रदेशका मुख्यमन्त्री कमलबहादुर शाहले बाजुराको हिमाली गाउँपालिका-३ च्याचौर क्षेत्रमा भएको झडपमा घाइते भएकाहरूको उपचारको जिम्मेवारी प्रदेश सरकारले लिने बताएका छन्।
नेपाली काँग्रेसको एकता तथा संगठन सुदृढीकरणसम्बन्धी सुदूरपश्चिम प्रदेशस्तरीय भेलालाई सम्बोधन गर्दै मुख्यमन्त्री शाहले घटनाबाट प्रभावित व्यक्तिहरूको उपचार, राहत तथा क्षतिपूर्तिका विषयमा प्रदेश सरकार गम्भीर रहेको बताएका हुन्। उनले क्षतिको विस्तृत विवरण प्राप्त भएपछि आवश्यक व्यवस्थापन गरिने स्पष्ट पारे।
मुख्यमन्त्री शाहका अनुसार घटनामा संलग्न दोषीमाथि कानुनी प्रक्रिया अघि बढाउन प्रहरी प्रशासन परिचालित भइसकेको छ। उनले अवरुद्ध बनेको कर्णाली करिडोर तत्काल सञ्चालनमा ल्याउन स्थानीयवासीसँग सहयोगको अपिल पनि गरेका छन्।
गत जेठ २ गते हिमाली गाउँपालिका–३ च्याचौर क्षेत्रमा अस्थायी प्रहरी चौकी निर्माणका क्रममा विवाद उत्पन्न भएपछि झडप भएको थियो। उक्त घटनामा हुम्लाबाट आएका स्थानीयसँगको विवादमा बाजुराका ६ जना घाइते भएको जनाइएको छ।
घटनापछि स्थानीय युवा समूहले गाउँपालिकाको केन्द्र धुलाचौर क्षेत्रमा कर्णाली करिडोर अवरुद्ध गरेका थिए। त्यसपछि जिल्ला प्रशासन कार्यालय बाजुराको पहलमा भएको सर्वपक्षीय छलफलबाट सडक सञ्चालनमा ल्याइएको थियो।
छलफलपछि घटनाको छानबिन गर्ने, लुटिएका सार्वजनिक तथा व्यक्तिगत सामग्री फिर्ता गराउने, घाइतेको उपचार सुनिश्चित गर्ने तथा विस्थापित स्थानीयको सुरक्षाको प्रत्याभूति दिलाउनेलगायत विभिन्न विषयमा सहमति भएको थियो। तर, सहमतिअनुसार माग कार्यान्वयन नभएको भन्दै स्थानीयवासी र युवाहरूले पुनः सडक अवरुद्ध गरेको जनाइएको छ।
प्रदेश सरकारले आर्थिक वर्ष २०८२–०८३ का लागि उक्त क्षेत्रमा अस्थायी प्रहरी चौकी निर्माण गर्न ४० लाख रुपैयाँ बजेट विनियोजन गरेको जनाएको छ। सो रकम हिमाली गाउँपालिकामार्फत खर्च हुने गरी निर्माण प्रक्रिया अघि बढाइएको प्रदेश सरकारको भनाइ छ।
मुख्यमन्त्री शाहले विवादित क्षेत्र सुदूरपश्चिम प्रदेशको प्रशासनिक क्षेत्रभित्र पर्ने उल्लेख गर्दै विनियोजित बजेट कार्यान्वयनमा सरकार प्रतिबद्ध रहेको बताएका छन्।
