सुर्खेत । कर्णाली प्रदेशका मुख्यमन्त्री यामलाल कँडेलले पदबाट राजीनामा दिएका छन्। शनिबार बसेको प्रदेशसभा बैठकलाई सम्बोधन गर्दै उनले आफ्नो राजीनामाको घोषणा गरेका हुन्।
मुख्यमन्त्री कँडेलविरुद्ध गत असार ३२ गते नेपाली कांग्रेस र नेकपाका १६ जना प्रदेशसभा सदस्यले अविश्वासको प्रस्ताव दर्ता गरेका थिए। सोही प्रस्तावमाथि छलफलका लागि शनिबार दिउँसो ३ बजे प्रदेशसभा बैठक बोलाइएको थियो। तर छलफलअघि नै मुख्यमन्त्री कँडेलले पदबाट बाहिरिने निर्णय सुनाएका हुन्।
यसअघि असार ३१ गते सत्ता साझेदार नेपाली कांग्रेसका चार मन्त्रीले सरकारबाट सामूहिक राजीनामा दिएका थिए। आर्थिक मामिला मन्त्री राजीवविक्रम शाह, जलस्रोत मन्त्री विजया बुढा, सामाजिक विकास मन्त्री घनश्याम भण्डारी तथा उद्योग, पर्यटन, वन तथा वातावरण मन्त्री सुरेश अधिकारीले पद त्याग गरेका थिए।
कँडेल २०८० साल चैत २७ गते मुख्यमन्त्री नियुक्त भएका थिए। त्यतिबेला तत्कालीन माओवादी केन्द्रको समर्थनमा उनी नेतृत्वमा सरकार गठन भएको थियो। तर केन्द्रमा पुष्पकमल दाहाल ‘प्रचण्ड’ नेतृत्वको सरकार पतन भएपछि कांग्रेस र एमालेबीच नयाँ सत्ता समीकरण बनेको प्रभाव प्रदेशमा पनि परेको थियो।
त्यसअनुसार २०८१ साल साउनमा कांग्रेस कर्णाली सरकारमा सहभागी भएको थियो। तर सत्ता हस्तान्तरणसम्बन्धी पूर्वसहमति एमालेले कार्यान्वयन नगरेको आरोप कांग्रेसले लगाउँदै आएको थियो। यही विवाद चुलिँदै गएपछि कांग्रेसका मन्त्रीहरूले सरकार छाडे र त्यसको भोलिपल्ट कांग्रेसले नेकपासँग नयाँ सत्ता सहकार्य अघि बढाउँदै मुख्यमन्त्री कँडेल नेतृत्वको सरकारविरुद्ध अविश्वासको प्रस्ताव दर्ता गरेको थियो।
