काठमाडौं । प्रधानमन्त्री वालेन्द्र शाहले सुनसरीमा आइतबार राति भएको घटनापछि विकसित शान्ति–सुरक्षाको अवस्थाबारे बुधबार सुरक्षा निकायका प्रमुखहरूसँग छुट्टाछुट्टै विस्तृत ब्रिफिङ लिएका छन्।
प्रधानमन्त्री तथा मन्त्रिपरिषद् कार्यालयमा गृहमन्त्री सुधन गुरुङको उपस्थितिमा भएको ब्रिफिङमा प्रधानमन्त्री शाहले नेपाल प्रहरीका महानिरीक्षक दानबहादुर कार्की र सशस्त्र प्रहरी बल, नेपालका महानिरीक्षक नारायणदत्त पौडेलसँग सुनसरीको पछिल्लो सुरक्षा अवस्था, देखिएका चुनौती र सम्भावित जोखिमबारे जानकारी लिएका हुन्।
प्रधानमन्त्रीको सचिवालयका अनुसार ब्रिफिङका क्रममा शाहले सुनसरीको अवस्था शीघ्र नियन्त्रणमा ल्याउन, सर्वसाधारणको जिउधनको सुरक्षा सुनिश्चित गर्न तथा सामाजिक सद्भाव बिथोल्ने गतिविधिमाथि कडा निगरानी राख्न सुरक्षा निकायलाई निर्देशन दिएका छन्।
उनले शान्ति–सुरक्षा कायम राख्ने विषयमा कुनै सम्झौता नगर्न र गृह मन्त्रालयअन्तर्गतका नेपाल प्रहरी तथा सशस्त्र प्रहरी बललाई उच्च सतर्कताका साथ प्रभावकारी रूपमा परिचालन गर्न पनि निर्देशन दिएका छन्।
