काठमाडौँ । संयुक्त राष्ट्रसङ्घले भोटेकोशी बाढीबाट प्रभावित नागरिकको उद्धार, राहत तथा पुनःस्थापनाका लागि ४ करोड ९६ लाख अमेरिकी डलर सहयोग जुटाउन अपिल गरेको छ ।
भोटेकोशी तथा त्रिशूली नदीमा आएको विनाशकारी बाढी र पहिरोबाट प्रभावित ८४ हजारभन्दा बढी नागरिकसम्म जीवनरक्षक मानवीय सहायता पुर्याउन राष्ट्रसङ्घले शुक्रबार अन्तर्राष्ट्रिय समुदायसँग सहयोगको अपिल गरेको हो ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको नेतृत्वमा सरकारले तयार पारेको चारमहिने योजनालाई प्राथमिकतामा राखेर उक्त रकम परिचालन गरिने नेपालस्थित राष्ट्रसङ्घीय कार्यालयले जनाएको छ । उच्च हिमाली क्षेत्रमा हिउँद सुरु हुनुअघि विस्थापित नागरिकले भोग्न सक्ने चिसो तथा सरुवा रोगको जोखिम न्यूनीकरण गर्नु योजनाको मुख्य उद्देश्य रहेको छ ।
राष्ट्रसङ्घ तथा मानवीय सहायता साझेदार निकायहरूले नेपाल सरकारले सञ्चालन गरिरहेको उद्धार तथा राहत अभियानसँग समन्वय गरेर काम गरिरहेका छन् । भदौ १० गते भोटेकोशी नदीमा आएको बाढीबाट रसुवा, नुवाकोट र धादिङका धेरै बस्ती प्रभावित तथा विस्थापित भएका छन् ।
बाढी र पहिरोका कारण सडक तथा यातायात पूर्वाधारमा ठूलो क्षति पुगेको छ भने विद्युत्, खानेपानी र सरसफाइका संरचनासमेत प्रभावित भएका छन् । यसले दुर्गम क्षेत्रका नागरिकलाई आधारभूत सेवाबाट समेत वञ्चित बनाएको राष्ट्रसङ्घले जनाएको छ ।
योजनाअन्तर्गत स्थानीय बजार सञ्चालनमा रहेका क्षेत्रमा प्रभावित परिवारलाई प्रत्यक्ष नगद सहायता, हिउँदअघि विस्थापित परिवारलाई अस्थायी आवास तथा न्यानो सामग्री, र विद्युत् सेवा नपुगेका क्षेत्रमा सौर्य उपकरण उपलब्ध गराउने तयारी छ ।
त्यस्तै, क्षतिग्रस्त खानेपानी प्रणाली मर्मत, पानी शुद्धीकरण प्रणाली जडान तथा सरसफाइ सामग्री वितरणमार्फत पानीजन्य रोग नियन्त्रण गर्ने लक्ष्य राखिएको छ । घुम्ती स्वास्थ्य शिविरमार्फत उपचार तथा पोषण सेवा, परिवारबाट छुट्टिएका बालबालिकाको पुनर्मिलन, आकस्मिक खाद्य सहायता र बाँचेका पशुधनको व्यवस्थापनमा समेत सहयोग गरिनेछ ।
नेपालका लागि संयुक्त राष्ट्रसङ्घीय आवासीय संयोजक लिला पिटर्स याहियाले बाढी र पहिरोले केही क्षणमै परिवारजन, घर तथा जीविकोपार्जनका आधार गुमाएको उल्लेख गर्दै सरकारको नेतृत्वमा सबैभन्दा दुर्गम बस्तीसम्म हिउँदअघि नै आवास, उपचार, स्वच्छ पानी र नगद सहायता पुर्याउनु अपिलको मुख्य प्राथमिकता रहेको बताइन् ।
