नयाँ दिल्ली । चिनियाँ राष्ट्रपति सी चिनफिङ १८औँ ब्रिक्स शिखर सम्मेलनमा सहभागी हुन शनिबार भारतको राजधानी नयाँ दिल्ली पुगेका छन्। भारतीय प्रधानमन्त्री नरेन्द्र मोदीको निमन्त्रणामा भारत पुगेका सीले सम्मेलनका क्रममा मोदीसँग द्विपक्षीय भेटवार्ता गर्ने कार्यक्रम छ।
झन्डै सात वर्षपछि हुन लागेको सीको भारत भ्रमणलाई चीन–भारत सम्बन्ध सुधारका लागि महत्त्वपूर्ण घटनाका रूपमा हेरिएको छ। भेटवार्ताका क्रममा दुई देशबीच लामो समयदेखि कायम सीमा विवाद, द्विपक्षीय सम्बन्ध सुदृढीकरण तथा आपसी हितका विभिन्न विषयमा छलफल हुने अपेक्षा गरिएको छ।
चिनियाँ विदेश मन्त्रालयले चीन भारतसँग संवादलाई निरन्तरता दिने, सहकार्यलाई थप मजबुत बनाउने तथा दुई देशबीचका मतभेदलाई उचित र रचनात्मक ढङ्गबाट समाधान गर्ने पक्षमा रहेको जनाएको छ।
सीको भ्रमणले पछिल्लो समय तनावपूर्ण बनेको चीन–भारत सम्बन्धमा संवाद र सहकार्यको नयाँ वातावरण सिर्जना गर्ने अपेक्षा गरिएको छ।
