काठमाडौं । चाडपर्व नजिकिएसँगै काठमाडौं उपत्यका ट्राफिक प्रहरीले लामो दूरीमा सञ्चालन हुने रात्रिकालीन सार्वजनिक सवारीसाधनमा दुई चालक राख्नुपर्ने नियम कार्यान्वयनमा कडाइ गर्ने भएको छ ।
यात्रुको सुरक्षा तथा सवारी दुर्घटना न्यूनीकरणका लागि उक्त नियमको प्रभावकारी कार्यान्वयन गराउन ट्राफिक प्रहरीले जाँच तथा अनुगमन बढाउने भएको हो ।
उपत्यका ट्राफिक प्रहरी कार्यालयका प्रमुख एवं प्रहरी वरिष्ठ उपरीक्षक सुरेशप्रसाद काफ्लेका अनुसार चाडपर्वका बेला यात्रुको चाप बढ्ने र रातिको समयमा लामो दूरीका बस सञ्चालन हुने भएकाले चालकको थकानका कारण हुन सक्ने दुर्घटना रोक्न दुई चालकको व्यवस्था प्रभावकारी रूपमा लागू गरिनेछ ।
लामो दूरीका सार्वजनिक सवारीसाधनमा दुई चालक भए–नभएको नियमित रूपमा जाँच गरिने र नियमविपरीत एक जना मात्रै चालक राखेर सवारी सञ्चालन गरेको पाइएमा प्रचलित कानुनअनुसार कारबाही गरिने प्रहरीले जनाएको छ ।
उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले रात्रिकालीन लामो दूरीका सवारीसाधनमा दुई चालक राख्नुपर्ने व्यवस्थालाई थप कडाइका साथ कार्यान्वयन गरिने बताए ।
उनका अनुसार दुई चालक भएमा पालैपालो सवारी चलाउन सकिने भएकाले लामो यात्राका क्रममा चालकको थकान व्यवस्थापन गर्न सहयोग पुग्नेछ ।
चालकको मादक पदार्थ सेवन पनि जाँच
ट्राफिक प्रहरीले लामो दूरीका सवारीसाधनका चालकले मादक पदार्थ तथा लागू पदार्थ सेवन गरे–नगरेको विषयमा समेत कडाइका साथ चेकजाँच गर्ने भएको छ ।
सवारी सञ्चालन गर्नुअघि तथा यात्राका क्रममा चालकको अवस्था जाँच गरी सम्भावित जोखिम नियन्त्रण गरिने प्रवक्ता सुवेदीले बताए ।
चाडपर्वका समयमा सार्वजनिक यातायातमा यात्रुको चाप बढ्ने, लामो दूरीका सवारीसाधनको आवागमन बाक्लिने र टिकटको माग उच्च हुने भएकाले यात्रुको सुरक्षा तथा यातायात व्यवस्थापनलाई प्राथमिकतामा राखेर विशेष अभियान सञ्चालन गर्न लागिएको ट्राफिक प्रहरीले जनाएको छ ।
अभियानअन्तर्गत सवारीसाधनको अवस्था, चालकको योग्यता तथा ट्राफिक नियम पालना भए–नभएको विषयमा समेत निगरानी गरिनेछ ।
बढी भाडा र टिकटमा अनियमितता रोक्न निगरानी
ट्राफिक प्रहरीले चाडपर्वका बेला यात्रु ठगी रोक्न सार्वजनिक यातायातमा समेत निगरानी बढाउने भएको छ ।
निर्धारितभन्दा बढी भाडा असुल्ने, टिकटमा अनियमितता गर्ने तथा यात्रुलाई असुविधा हुने गतिविधि रोक्न सम्बन्धित निकायसँग समन्वय गरी आवश्यक कदम चालिने कार्यालयले जनाएको छ ।
दिवा तथा रात्रिकालीन समयमा सडकमा ट्राफिक प्रहरीको उपस्थिति बढाइनेछ । मुख्य सडक, बढी सवारी आवागमन हुने क्षेत्र तथा लामो दूरीका सार्वजनिक सवारीसाधन सञ्चालन हुने स्थानमा प्रहरी परिचालन गरी नियमित जाँच तथा अनुगमन गरिनेछ ।
ट्राफिक प्रहरीले सवारी दुर्घटना न्यूनीकरणका लागि चालकले ट्राफिक नियम पालना गर्नुपर्ने र यात्रुले पनि सुरक्षित यात्राका लागि आवश्यक सावधानी अपनाउनुपर्ने जनाएको छ ।
चाडपर्वमा सडकमा सवारीसाधनको चाप र यात्रुको आवागमन बढ्ने भएकाले ट्राफिक व्यवस्थापनलाई थप प्रभावकारी बनाउँदै यात्रुलाई सुरक्षित र सहज यात्रा गराउने उद्देश्यले विशेष अभियान सञ्चालन गर्न लागिएको कार्यालयले जनाएको छ ।
