बारा । भेटेरिनरी समुदायबीच एकता, भाइचारा र सहकार्य अभिवृद्धि गर्ने उद्देश्यले आयोजित भेटेरिनरी प्रिमियर लिग (भीपीएल) सिजन–४ को उपाधि एयर इगलले जितेको छ। फाइनलमा भेट किङलाई ९ विकेटले पराजित गर्दै एयर इगलले उपाधि हात पारेको हो।
फाइनल खेलमा पहिले ब्याटिङ गरेको भेट किङले ६ विकेट गुमाएर ५५ रन बनाएको थियो। जवाफी ब्याटिङमा उत्रिएको एयर इगलले एक विकेट मात्र गुमाएर लक्ष्य पूरा गरेपछि सहज जित निकाल्दै च्याम्पियन बन्न सफल भयो।
प्रतियोगितामा एयर इगल, स्टेलियन किङ, भेट किङ र किङ कोब्रा गरी चार टोली सहभागी थिए। पहिलो खेलमा एयर इगलले स्टेलियन किङलाई २५ रनले पराजित गर्दै विजयी सुरुवात गरेको थियो। त्यसैगरी, दोस्रो खेलमा भेट किङले किङ कोब्रालाई ३० रनले हराउँदै फाइनलमा स्थान सुरक्षित गरेको थियो।
प्रतिकूल मौसम र समय व्यवस्थापनका कारण पहिलो दुई खेल १५ ओभरको सट्टा १२ ओभरमा सञ्चालन गरिएको थियो भने फाइनल खेल १०–१० ओभरमा खेलाइएको थियो।
वि.सं. २०८० मा सानो खेलकुद गतिविधिका रूपमा सुरु भएको भीपीएल अहिले भेटेरिनरी समुदायलाई एउटै मञ्चमा जोड्ने महत्त्वपूर्ण प्रतियोगिताका रूपमा स्थापित हुँदै गएको आयोजकले जनाएको छ। प्रतियोगिताले पशु स्वास्थ्य क्षेत्रमा आबद्ध व्यक्तिहरूबीच आपसी सम्बन्ध, सहकार्य र एकता सुदृढ बनाउन योगदान पुर्याउँदै आएको छ।
नेपाल भेटेरिनरी एसोसिएसन (एनभीए), मधेश प्रदेश, नेपाल पशुपन्छी औषधि बजार प्रतिनिधि संघ, वीरगञ्ज शाखा, नेपाल पशुपन्छी औषधि व्यवसायी संघ, वीरगञ्ज शाखा, एभीपी, पर्सा र आरभीपी, रौतहटको संयुक्त आयोजनामा प्रतियोगिता सम्पन्न भएको हो।
भीपीएल सिजन–४ का संयोजक तथा एनभीए मधेश प्रदेशका अध्यक्ष डा. दिनेश कुमार तिवारीले प्रतियोगिता खेलकुदमा मात्र सीमित नभई भेटेरिनरी समुदायको साझा पहिचान र एकताको प्रतीकका रूपमा विकास हुँदै गएको बताए। विभिन्न संस्था तथा क्षेत्रका पशु स्वास्थ्यकर्मीलाई एउटै मञ्चमा जोड्नु प्रतियोगिताको महत्त्वपूर्ण उपलब्धि भएको उनको भनाइ थियो। उनले आगामी संस्करणलाई थप व्यवस्थित र भव्य बनाउने प्रतिबद्धतासमेत व्यक्त गरे।
त्यसैगरी, आयोजक समितिका सदस्य सचिव डा. सुदिप कुमार शर्माले प्रतियोगिताले पेशागत व्यस्तताबीच भेटेरिनरी क्षेत्रमा आबद्ध व्यक्तिहरूलाई भेटघाट, अनुभव आदानप्रदान र स्वस्थ प्रतिस्पर्धाको अवसर प्रदान गरेको बताए। प्रतियोगिता सफल बनाउन सहयोग गर्ने संस्था, खेलाडी, अतिथि र शुभेच्छुकप्रति उनले आभार व्यक्त गरे।
कार्यक्रमका प्रमुख अतिथि मधेश प्रदेश सरकारका भूमि व्यवस्था, कृषि तथा सहकारीमन्त्री श्यामप्रसाद पटेलले यस्ता गतिविधिले भेटेरिनरी समुदायमा सद्भाव, सहकार्य र अनुशासनको भावना विकास गर्न सहयोग पुर्याउने बताए। पशुपन्छीको स्वास्थ्य, कृषि तथा पशुपालन क्षेत्रको विकासमा भेटेरिनरी जनशक्तिको भूमिका महत्त्वपूर्ण रहेको उल्लेख गर्दै उनले पेशाकर्मीबीचको एकता र समन्वयले सेवा क्षेत्रलाई थप सुदृढ बनाउने धारणा व्यक्त गरे।
कार्यक्रमका विशिष्ट अतिथि तथा भूमि व्यवस्था, कृषि तथा सहकारी मन्त्रालयका सचिव डा. सञ्जय यादवले भेटेरिनरी क्षेत्र पशुपन्छीको स्वास्थ्य, पशुजन्य उत्पादन, खाद्य सुरक्षा र कृषि अर्थतन्त्रसँग प्रत्यक्ष रूपमा जोडिएको बताए। यस्ता कार्यक्रमले पेशागत जिम्मेवारीसँगै आपसी सम्बन्ध र सहकार्यलाई बलियो बनाउने उनको भनाइ थियो।
कार्यक्रममा पशु सेवा तालिम केन्द्र, मधेश प्रदेशका प्रमुख तथा एनभीए मधेश प्रदेशका पूर्वअध्यक्ष डा. सञ्जीव ठाकुर, पर्सौनी गाउँपालिकाकी उपाध्यक्ष किरण साह, गाउँपालिकाका वडा नं. १ र २ का वडाध्यक्ष, एनभीएका सल्लाहकार डा. विनोद यादव र नारायण गुरुङ, अमन गुरुवाचार्यलगायतको उपस्थिति थियो।
प्रतियोगितामा एयर इगलका कप्तान सन्तोष दाहाल, स्टेलियन किङका कप्तान डा. हरेराम यादव, भेट किङका कप्तान ब्रिजेश साह र किङ कोब्राका कप्तान अनिल पटेलले आ–आफ्नो टोलीको नेतृत्व गरेका थिए।
