काठमाडौं – नेपाली कांग्रेसका नियमित महाधिवेशन पक्षधर पाँच प्रदेश सभापति र ४८ जिल्लाका सभापतिहरूले पार्टीभित्र देखिएको वर्तमान अवस्था गम्भीर र संवेदनशील रहेको भन्दै एकताबद्ध भएर अघि बढ्न आह्वान गरेका छन्।
संयुक्त रूपमा जारी गरिएको विज्ञप्तीमा नेपाली कांग्रेस पुनः इतिहासको कठिन मोडमा उभिएको उल्लेख गर्दै पार्टीलाई सशक्त, अनुशासित र एकताबद्ध रूपमा अगाडि बढेको देख्न चाहने असंख्य लोकतन्त्रवादीहरूको अपेक्षा रहेको जनाइएको छ ।
संवेदनशील समयमा ‘विशेष महाधिवेशन’ को नाममा विधानविपरीत गतिविधि गर्दै पार्टीलाई विभाजनतर्फ धकेल्ने प्रयास आम लोकतन्त्रवादी, नेपाली कांग्रेसका शुभचिन्तक तथा समग्र देशको हितविपरीत रहेको उनीहरूको ठहर छ।
विज्ञप्तीमार्फत आम कांग्रेसजन, सम्पूर्ण देशवासी तथा शुभचिन्तकहरूलाई लोकतन्त्र र एकताबद्ध नेपाली कांग्रेसको पक्षमा दृढतापूर्वक उभिन आग्रह गरिएको छ।
