काठमाडौँ-आइसिसी विश्वकप लिग-२ अन्तर्गत नेपालले हार बेहोरेको छ। टियु मैदानमा वर्षाले प्रभावित भएको खेलमा नेपाल डिएलएस मेथडमा १०२ रनले पराजित भएको हो।
ओमानले दिएको ३०६ रनको लक्ष्य पछ्याएको नेपालले ३६.५ ओभरमा ७ विकेट गुमाएर १५५ रन जोड्यो। दीपेन्द्र सिंह ऐरीले ६० रनको अर्धशतकीय इनिङ्स खेले।
भीम सार्कीले २८, आसिफ शेखले १९, आरिफ शेख र गुलशन झाले १४-१४ रन बनाउँदा कप्तान रोहित पौडेल १० रनमै पभेलियन फर्किए। कुशल भुर्तेल र बसिर अहमदले १-१ रनमात्रै जोड्न सके।
बलिङतर्फ ओमानका नदिम खानले तीन, शकिल अहमदले दुई तथा वसिम अली र मुहम्मद इमरानले एक-एक विकेट लिए।
त्यसअघि टस जितेर पहिले ब्याटिङ थालेको ओमानले ५० ओभरमा ८ विकेट गुमाएर ३०५ रन जोड्यो। कप्तान जतिन्दर सिंहले शतकीय पारी खेले। उनले ९६ बलमा १५ चौका र ५ छक्काको मद्दतले १३० रन जोडे।
यस्तै, जितेन रमानन्दीले ४३, आर्यान बिश्टले ३५, हम्माद मिर्जाले ३०, विनायक शुक्ला र आशिष ओडेदाराले २३-२३ रन जोडे। बलिङतर्फ नेपालका सोमपाल कामीले चार विकेट लिए भने सन्दीप लामिछाने र दीपेन्द्र सिंह ऐरीले दुई-दुई विकेट लिए।
नेपालले पहिलो खेलमा यूएईलाई ३७ रनले हराएको थियो भने ओमान यूएईसँग २५ रनले पराजित भएको थियो ।
