काठमाडौँ। मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउन महाअभियान नेपाल’का संयोजक दुर्गा प्रसाईँ पक्राउ परेका छन् । उनी वीरगञ्जबाट पक्राउ परेको प्रहरी अधिकारीले बताएका छन् ।
प्रहरी स्रोतका अनुसार प्रसाईंलाई वीरगञ्जस्थित दियालो होटेलबाट नियन्त्रणमा लिइएको हो । पक्राउको क्रममा प्रहरी पक्षबाट ‘माथिको आदेश’ आएको भन्दै उनलाई नियन्त्रणमा लिइएको जनाइएको छ ।
यद्यपि, उनीमाथि कुन कसुर वा आरोपमा पक्राउ गरिएको हो भन्ने विषयमा भने प्रहरी अधिकारीहरूले औपचारिक जानकारी दिएका छैनन् । प्रहरी स्रोतले पक्राउ परेको पुष्टि गरे पनि पक्राउको आधारबारे जानकारी नभएको बताएको छ ।
प्रसाईँ सोमबार सिमरा विमानस्थल हुँदै वीरगञ्ज पुगेका थिए । उनी मंगलबार वीरगञ्जमा आयोजना हुने कार्यक्रममा सहभागी हुन त्यहाँ पुगेको बताइएको छ ।
वीरगञ्ज प्रस्थानअघि सिमरा विमानस्थलमा सञ्चारकर्मीसँग कुराकानी गर्दै प्रसाईँले वर्तमान सरकार तथा राष्ट्रिय स्वतन्त्र पार्टी (रास्वपा) का सांसदहरूमाथि आलोचनात्मक टिप्पणी गरेका थिए ।
पक्राउपछि उनीमाथि अनुसन्धान कुन विषयमा अघि बढाइने, कुन निकायको निर्देशनमा नियन्त्रणमा लिइएको हो तथा थप कानुनी प्रक्रिया के हुने भन्नेबारे भने सम्बन्धित निकायबाट औपचारिक विवरण आउन बाँकी रहेको छ ।
