अहमदाबाद – इन्डियन प्रिमियर लिग (आईपीएल) २०२६ अन्तर्गत बिहीबार राति सम्पन्न खेलमा गुजरात टाइटन्सले चेन्नई सुपर किङ्समाथि ८९ रनको फराकिलो जित दर्ता गरेको छ। अहमदाबादस्थित नरेन्द्र मोदी रंगशालामा भएको खेलमा गुजरातले दिएको २ सय ३० रनको विशाल लक्ष्य पछ्याएको चेन्नई १३.४ ओभरमा मात्र १ सय ४० रनमा समेटियो।
टस हारेर पहिले ब्याटिङको निम्तो पाएको गुजरातले निर्धारित २० ओभरमा ४ विकेट गुमाएर २ सय २९ रनको बलियो योगफल खडा गरेको थियो। गुजरातका लागि साई सुदर्शनले ५३ बलमा ८४ रन र कप्तान शुभमन गिलले ३७ बलमा ६४ रनको विस्फोटक इनिङ्स खेले। उनीहरूले पहिलो विकेटका लागि १ सय २५ रनको उत्कृष्ट साझेदारी गर्दै टोलीलाई बलियो सुरुवात दिलाएका थिए। यस्तै, जस बटलरले २७ बलमा अविजित ५७ रनको योगदान दिए। चेन्नईका मुकेश चौधरी, स्पेन्सर जोन्सन र अंशुल कम्बोजले समान १–१ विकेट लिए।
२ सय ३० रनको विशाल लक्ष्य पछ्याएको चेन्नईको ब्याटिङ लाइनअप गुजरातका तीव्र गतिका बलर मोहम्मद सिराज र रासिद खानसामु निरिह बन्यो। चेन्नईका लागि शिवम दुबेले १७ बलमा सर्वाधिक ४७ रन र म्याट शर्टले २४ रन बनाउनु बाहेक अन्य ब्याटरले ठूलो स्कोर खडा गर्न सकेनन्। कप्तान रुतुराज गायकवाड १६ रनमा आउट भए भने सञ्जु सामसन खाता नै नखोली पभिलियन फर्किए।
चेन्नईलाई सस्तैमा समेट्ने क्रममा गुजरातका मोहम्मद सिराजले ३ ओभरमा २६ रन खर्चेर महत्वपूर्ण ३ विकेट लिए। उनी खेलको ‘प्लेयर अफ दि म्याच’बने। त्यस्तै, रासिद खानले १८ रन खर्चेर ३ विकेट र कागिसो रबाडाले ३२ रन खर्चेर ३ विकेट लिएपछि गुजरातले सहज जित हात पारेको हो।
यो जितसँगै गुजरातले १८ अंक जोडेको छ भने चेन्नई १२ अंकसहित आईपीएलको यो सिजनबाट बिदा भएको छ ।
