अर्थमन्त्री डा. स्वर्णिम वाग्लेले बजेट महत्त्वाकांक्षी र ठूलो आकारको नआएको दाबी गरेका छन् । बजेट सार्वजनिकपछि आइतबार सञ्चारकर्मीलाई मन्त्रालयमा निम्ता गर्दै स्पष्टीकरण दिएका वाग्लेले बाहिर भनिएजस्तै र हल्ला गरिएजस्तै बजेट महत्त्वाकांक्षी र ठूलो आकारको नआएको दाबी गरे ।
उनले भने, ‘मेरो भित्रि मनदेखिको चाहना ठूलो आकारको बजेट ल्याउने हुँदै होइन । भूकम्प, कोरोनाअघि जुन आकारमा बजेट बन्ने गरेका थिए, सोही सानो आकारमा बजेट ल्याउने चाहना थियो । तर, यसो भन्दैगर्दा अहिलेको बजेट ठूलो छैन ।’
यसअघि कुल ग्रार्हस्थ्य उत्पादन (जीडीपी) को तुलनामा औसत २५ देखि ३० प्रतिशतको आकारमा वार्षिक बजेट बन्ने गरेकोमा आफूले ३० प्रतिशत तलकै प्रतिशतमा बजेट ल्याएको उनले बताए ।
‘बजेट प्रक्षेपित जीडीपीको तुलनामा जम्मा २८.५ प्रतिशतमा आएको छ । हाम्रो प्रक्षेपित जीडीपी ७४ खर्ब ५८ अर्ब रुपैयाँ बराबर रहेको छ,’ वाग्लेले भने । सोही अवसरमा उनले बजेटअघि नै सञ्चारमाध्ययमहरूमा सरकारले २५ खर्बको बजेट ल्याउँदै छ भनेर हल्ला मच्चाएको भन्दै सरकारमाथि अस्वाभाविक दबाब दिन खोजिएको बताए ।
तर, २१ खर्बको बजेट समय र आवश्यकतालाई हेरेर ल्याइएको उनले बताए । उनले भने, ‘बजेटको आकार र अंकसँग सरोकार हुँदैन, कार्यान्वयनसँग हुन्छ ।’ सरकारले बजेट कार्यान्वयन गरेर देखाउने अर्थमन्त्री वाग्लेले दाबी गरे ।
