काठमाडौँ । प्रतिनिधि सभा नियमावलीको मस्यौदामाथि दर्ता भएका संशोधन प्रस्तावहरूलाई संसदीय समितिमा पठाउनुपर्ने माग गर्दै विपक्षी दलका सांसदहरूले अवरोध गरेपछि प्रतिनिधि सभा बैठक स्थगित भएको छ।
बैठकका क्रममा नियमावली संशोधनसँग सम्बन्धित प्रस्तावहरूमाथि छलफल अघि बढाउने विषयमा विपक्षी सांसदहरूले असहमति जनाएका थिए। उनीहरूको माग संशोधन प्रस्तावहरूलाई थप अध्ययन र छलफलका लागि विषयगत समितिमा पठाउनुपर्ने रहेको थियो।
नेपाली कांग्रेसकी प्रमुख सचेतक बासना थापाले संशोधनहरूलाई सम्बन्धित समितिमा पठाएर विस्तृत छलफल गरिनुपर्ने धारणा राखेकी थिइन्। विपक्षी दलका अन्य सांसदहरूले पनि उक्त प्रस्तावमा समर्थन जनाएका थिए।
तर सभामुख डोलप्रसाद अर्यालले संशोधन प्रस्तावलाई निर्णयार्थ प्रस्तुत गर्ने प्रक्रिया अघि बढाए। उनले प्रस्तावहरूमाथि सदनको मत लिने प्रक्रिया प्रारम्भ गरेपछि विपक्षी दलका सांसदहरूले विरोध जनाउँदै संसद्को वेलमा पुगेर घेराउ गरेका थिए।
विरोधका क्रममा सांसदहरूले नाराबाजी गर्दै बहुमतको बलमा प्रक्रियालाई अघि बढाउन खोजिएको आरोप लगाएका थिए। स्थिति तनावपूर्ण बनेपछि एक विपक्षी सांसद सभामुखको आसनतर्फ जान खोजे पनि मर्यादा पालकहरूले उनलाई रोकेको जनाइएको छ।
सभामुख अर्यालले पटक-पटक सांसदहरूलाई सदनको मर्यादा कायम राख्न आग्रह गरेका थिए। तर अवरोध जारी रहेपछि बैठक तत्कालका लागि १५ मिनेट स्थगित गरिएको छ।
