काठमाडौँ । अर्थ मन्त्रालयले आफ्नो मातहतका दुई प्रमुख राजस्व निकायको नेतृत्व परिवर्तन गर्दै भन्सार विभाग र आन्तरिक राजश्व विभागमा नयाँ महानिर्देशक नियुक्त गरेको छ। मन्त्रालयले सोमबार(आज) गरेको निर्णयअनुसार दुवै विभागमा सहसचिव तहका अधिकारीलाई नेतृत्वको जिम्मेवारी दिइएको हो।
मन्त्रालयका अनुसार भन्सार विभागको महानिर्देशकमा सहसचिव यमलाल भुसाल नियुक्त भएका छन्। विभागका निमित्त महानिर्देशक भरतमणि पाण्डेयलाई भने अर्थ मन्त्रालयबाहिर सरुवा गरिएको छ। त्यस्तै, भन्सार विभागको उपमहानिर्देशकको जिम्मेवारी सहसचिव प्रेमप्रसाद आचार्यलाई दिइएको मन्त्रालयले जनाएको छ।
यस्तै, आन्तरिक राजश्व विभागको महानिर्देशकमा सहसचिव डा. भीष्मकुमार भुसाल नियुक्त भएका छन्। यसअघि विभागको नेतृत्व सम्हालिरहेका रमेश अर्याललाई पनि अर्थ मन्त्रालयबाहिर सरुवा गरिएको छ।
अर्थ मन्त्रालयका अनुसार नयाँ जिम्मेवारी पाएका सहसचिव यमलाल भुसाल, डा. भीष्मकुमार भुसाल र प्रेमप्रसाद आचार्य हालै मन्त्रिपरिषद्को निर्णयबाट अर्थ मन्त्रालयमा सरुवा भएर आएका अधिकारी हुन्। सरुवापछि उनीहरूलाई मन्त्रालयअन्तर्गतका प्रमुख राजस्व निकायको नेतृत्वको जिम्मेवारी प्रदान गरिएको हो।
भन्सार विभाग र आन्तरिक राजश्व विभाग सरकारका प्रमुख राजस्व संकलन गर्ने निकाय हुन्। भन्सार विभागले आयात–निर्यातसँग सम्बन्धित राजस्व व्यवस्थापन तथा भन्सार प्रशासनको जिम्मेवारी सम्हाल्दै आएको छ भने आन्तरिक राजश्व विभागले आयकर, मूल्य अभिवृद्धि कर (भ्याट), अन्त:शुल्कलगायत आन्तरिक राजस्व व्यवस्थापनको काम गर्दै आएको छ।
मन्त्रालयले गरेको नेतृत्व परिवर्तनसँगै दुवै विभागमा राजस्व प्रशासनलाई थप प्रभावकारी, पारदर्शी र परिणाममुखी बनाउने अपेक्षा गरिएको छ। सरकारले राजस्व परिचालन सुदृढ गर्ने तथा प्रशासनिक कार्यसम्पादनलाई प्रभावकारी बनाउने उद्देश्यअनुसार नेतृत्व हेरफेर गरिएको मन्त्रालयको भनाइ छ।
