काठमाडौँ । आईसीसी क्रिकेट विश्वकप लिग–२ अन्तर्गत नेदरल्यान्ड्समा जारी त्रिकोणात्मक एकदिवसीय शृंखलामा लगातार दुई हार बेहोरेको नेपालले सोमबार तेस्रो खेलमा नामिबियाको सामना गर्दै पुनरागमनको प्रयास गर्नेछ।
नेपाल र नामिबियाबीचको खेल सोमबार दिउँसो ४:४५ बजे सुरु हुनेछ। नेदरल्यान्ड्स र नामिबियाविरुद्धका सुरुआती दुवै खेलमा ब्याटिङ, बलिङ र फिल्डिङ तीनै विभागमा अपेक्षित प्रदर्शन गर्न नसक्दा नेपाल पराजित भएको थियो।
लगातारको हारले लिग–२ को अंकतालिकामा नेपालको अवस्था थप दबाबपूर्ण बनेको छ। शीर्ष चारभित्र रहँदै विश्वकप ग्लोबल क्वालिफायरमा सिधै स्थान बनाउने लक्ष्य अब निकै कठिन देखिएको छ।
पहिलो खेलमा टस हारेर पहिले ब्याटिङ गरेको नेपाल नामिबियाका जेजे स्मिथको उत्कृष्ट बलिङसामु टिक्न सकेन र १५८ रनमा समेटियो। नामिबियाले उक्त लक्ष्य ३७.४ ओभरमा मात्र दुई विकेट गुमाएर पूरा गर्दै आठ विकेटको सहज जित दर्ता गरेको थियो।
दोस्रो खेलमा पनि नेपालले नेदरल्यान्ड्सविरुद्ध १५८ रनकै लक्ष्य प्रस्तुत गरेको थियो। तर घरेलु टोलीले ३५ ओभरमै चार विकेट गुमाएर लक्ष्य भेट्टाउँदै ६ विकेटको जित निकाल्यो।
यता, नेदरल्यान्ड्सले शृंखलामा लगातार दोस्रो जित पनि हासिल गरिसकेको छ। नेपाललाई हराएपछि शनिबार नामिबियालाई ५८ रनले पराजित गर्दै नेदरल्यान्ड्सले ३० खेलबाट ३६ अंक जोडेको छ र अंकतालिकाको तेस्रो स्थानमा आफ्नो पकड बलियो बनाएको छ।
समान ३० खेल खेलेका नेपाल र नामिबियाको समान २४ अंक छ। नेपाल पाँचौँ तथा नामिबिया छैटौँ स्थानमा छन्।
नेपालले सोमबार नामिबियासँग खेलिसकेपछि बुधबार शृंखलाको अन्तिम खेलमा फेरि नेदरल्यान्ड्सको सामना गर्नेछ। विश्वकप ग्लोबल क्वालिफायरमा सिधै स्थान बनाउने सम्भावना जीवित राख्न नेपाललाई अब बाँकी सबै खेल जित्नुपर्ने दबाब रहेको छ।
