काठमाडौँ -अष्ट्रेलियामा हुने टप एन्ड टी–२० सिरिजमा नेपाल दोस्रोपटक सहभागी हुँदैछ। अघिल्लो संस्करणमा सिनियर टोली पठाएको नेपाल क्रिकेट सङ्घ (क्यान)ले यसपटक भने अनिलकुमार साहको कप्तानीमा नेपाल ‘ए’ टोलीलाई प्रतिस्पर्धामा उतार्दैछ।
अनुभवी र युवा खेलाडीको मिश्रण रहेको टोलीका लागि यो प्रतियोगिता अन्तर्राष्ट्रिय स्तरको प्रतिस्पर्धामा आफूलाई प्रमाणित गर्ने अवसरसमेत बन्नेछ। नेपालले अघिल्लो संस्करणमा छ खेल खेल्दा दुईमा जित र चार खेलमा हार व्यहोरेको थियो। यसपटक ‘ए’ टोलीसामु उक्त नतिजा सुधार्ने चुनौती छ।
मुख्य प्रशिक्षक राजु बस्न्यातले टोलीले पछिल्लो १०–१२ दिन नियमित अभ्यास गरेको र अष्ट्रेलियाको फरक कन्डिसन चुनौतीपूर्ण भए पनि सकारात्मक नतिजाको अपेक्षा गरिएको बताए। उनका अनुसार नेपाली क्रिकेटको दीर्घकालीन खेलाडी विकासका लागि ‘ए’ टोलीको अवधारणा महत्त्वपूर्ण छ। ‘ए’ टोलीबाट नयाँ खेलाडी सिनियर टोलीमा पुग्ने तथा लय गुमाएका सिनियर खेलाडीले पुनरागमनको अवसर पाउने भएकाले यसले नेपालको खेलाडीको आधार फराकिलो बनाउन सहयोग गर्ने उनको भनाइ छ।
कप्तान साहले पनि अष्ट्रेलियाको कन्डिसनलाई ध्यानमा राखेर योजनाबद्ध अभ्यास गरिएको बताएका छन्। छोटो तयारीका बाबजुद टप एन्ड टी–२० जस्तो प्रतियोगितामा प्राप्त अवसर सदुपयोग गर्ने लक्ष्य रहेको उनले बताए।
नेपालले अगस्ट २१ मा नर्दन टेरिटोरी स्ट्राइकविरुद्ध पहिलो खेल खेल्नेछ। त्यसपछि अगस्ट २२ मा बङ्गलादेश हाई पर्फर्मेन्स, २४ मा होबार्ट हरिकेन्स, २६ मा अस्ट्रेलियन क्यापिटल टेरिटोरी, २७ मा हैदराबाद किङ्समेन एकेडेमी र २९ मा भिक्टोरिया सिए–११ विरुद्ध प्रतिस्पर्धा गर्नेछ।
टप एन्ड टी–२० पछि नेपाल ‘ए’ले न्युजिल्यान्ड ‘ए’, तास्मानिया र साउथ अष्ट्रेलियाविरुद्ध एकदिवसीय अभ्यास खेल पनि खेल्ने क्यानले जनाएको छ। सिनियर टोली एसिसी प्रिमियर लिगमा व्यस्त हुने भएकाले यसपटक ‘ए’ टोलीलाई अष्ट्रेलिया पठाउन लागिएको हो।
नेपाल ‘ए’ टोलीमा कप्तान अनिलकुमार साहसँगै कुशल भुर्तेल, लोकेश बम, तृतराज दास, मयन यादव, कुशल मल्ल, राशिद खान, पवन सर्राफ, दीपक डुम्रे, नारायण जोशी, आकाश चन्द, शाहब आलम, विपिन खत्री, रिजन ढकाल र युवराज खत्री छन्।
