काठमाडौँ । अस्ट्रेलियामा जारी टप एन्ड टी–२० क्रिकेट सिरिजमा नेपाल ‘ए’ ले आज आफ्नो पहिलो खेल खेल्दैछ। नेपालले प्रतियोगिताको उद्घाटन खेलमा आयोजक एनटी स्ट्राइकको सामना गर्नेछ। खेल नेपाली समयअनुसार दिउँसो २ः१५ बजे सुरु हुनेछ।
नेपाल क्रिकेट सङ्घ (क्यान) ले अनिल शाहको कप्तानीमा १५ सदस्यीय टोली अस्ट्रेलिया पठाएको हो। टोलीमा कुशल भुर्तेल, लोकेश बम, तृतराज दास, मयन यादव, पवन सर्राफ, दीपक डुम्रे, कुशल मल्ल, रासिद खान, नारायण जोशी, आकाश चन्द, शाहब आलम, बिपिन खत्री, युवराज खत्री र रिजन ढकाल छन्।
प्रतियोगिताको लिग चरणमा नेपालले कुल ६ खेल खेल्नेछ। एनटी स्ट्राइकविरुद्धको खेलपछि नेपालले अगस्ट २२ मा बङ्गलादेश ‘हाइ–परफर्मेन्स’ टोलीसँग प्रतिस्पर्धा गर्नेछ।
त्यसपछि नेपालले अगस्ट २४ मा हरिकेन्स, अगस्ट २६ मा एसीटी कमेट्स तथा त्यसपछि किङ्समेन र भिक्टोरियासँग खेल्ने तालिका रहेको छ।
नेपालले यसअघि पनि टप एन्ड टी–२० सिरिजमा सहभागिता जनाएको थियो। अघिल्लो संस्करणमा नेपालले ६ खेल खेल्दा दुई खेलमा जित निकाल्दा चार खेलमा पराजित भएको थियो।
