काठमाडौं । रसुवाबाट आएको भोटेकोशी नदीको बाढीका कारण पृथ्वी राजमार्गअन्तर्गत काठमाडौंको नागढुङ्गादेखि चितवनको भरतपुरसम्मको सडकखण्ड पूर्णरूपमा बन्द गरिएको छ।
केन्द्रीय प्रहरी प्रवक्ता डीआईजी अविनारायण काफ्लेका अनुसार बाढीले धादिङ जिल्लाअन्तर्गत राजमार्गका विभिन्न क्षेत्रमा प्रभाव पारेको र थप क्षेत्रमा फैलिने जोखिम रहेकाले दुवैतर्फबाट सवारी आवागमन रोकिएको हो।
बाढीका कारण दर्जनौँ बस्ती तथा बजार प्रभावित भई ठूलो क्षति पुगेको प्रहरीले जनाएको छ। प्रभावित तटीय क्षेत्रका बासिन्दाको उद्धारका लागि काठमाडौं उपत्यकाबाट विपद् व्यवस्थापनमा खटिने प्रहरी टोली घटनास्थलतर्फ परिचालन गरिएको डीआईजी काफ्लेले जानकारी दिए।
