काठमाडौं– रसुवामा बुधबार बिहान आएको भीषण बाढीपछि प्रधानमन्त्री वालेन्द्र शाहले विपद् जोखिम न्यूनीकरण तथा व्यवस्थापन राष्ट्रिय परिषद्को बैठक बोलाएका छन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको बैठकमा रसुवा बाढीबाट हालसम्म भएको क्षतिको विवरणबारे जानकारी गराइएको छ। बैठकमा प्रधानमन्त्री शाहले प्रभावित क्षेत्रमा तत्काल उद्धार, खोज तथा राहत कार्य प्रभावकारी बनाउन सम्बन्धित निकायलाई आवश्यक निर्देशन दिएका छन्।
प्रधानमन्त्री शाहले विपद्को यस घडीमा सबैलाई आ–आफ्नो क्षेत्रबाट बाढी प्रभावित नागरिकको उद्धार, खोज तथा राहतमा जुट्न आग्रह गरेका छन्। उनले मानवीय जीवनरक्षा, सुरक्षित उद्धार र तत्काल राहतलाई पहिलो प्राथमिकता दिन निर्देशन दिएका छन्।
उद्धार तथा राहत कार्यमा संलग्न सबै सरकारी तथा सुरक्षा निकायबीच प्रभावकारी समन्वय आवश्यक रहेकोमा पनि उनले जोड दिएका छन्।
प्रधानमन्त्री शाहले बाढी प्रभावित क्षेत्रका नागरिकलाई सुरक्षित स्थानमा जान र स्थानीय प्रशासन तथा सुरक्षा निकायले जारी गरेका निर्देशन पूर्ण रूपमा पालना गर्न आग्रह गरेका छन्।
उनले विपद्सम्बन्धी सूचना प्राप्त गर्दा सरकारी निकाय, स्थानीय प्रशासन, सुरक्षा निकाय तथा विश्वसनीय सञ्चारमाध्यमबाट प्राप्त आधिकारिक सूचनालाई मात्र आधार बनाउन आग्रह गर्दै अप्रमाणित सूचना, हल्ला तथा अफवाह नफैलाउन समेत अनुरोध गरेका छन्।
रसुवा बाढीबाट प्रभावित नागरिकप्रति ऐक्यबद्धता जनाउँदै प्रधानमन्त्री शाहले उद्धार, खोज तथा राहत कार्यमा सक्रिय रूपमा सहयोग गर्न सबैमा अपिल गरेका छन्।
