काठमाडौँ– कप्तान सन्दीप लामिछानेसहित नेपाली बलर चम्किएपछि एसिसी प्रिमियर कपको पहिलो खेलमा बहराइनले नेपाललाई ८८ रनको सामान्य लक्ष्य दिएको छ।
सोमबार मलेसियाको बाँगीमा टस हारेर पहिले ब्याटिङ गरेको बहराइन ३६.२ ओभरमा सबै विकेट गुमाउँदै ८७ रनमा समेटियो।
बहराइनका लागि फिआज अहमेदले १५ बलमा सर्वाधिक १५ रन बनाए। मुहम्मद वासिमले १३ रन जोडे। अन्य कुनै पनि ब्याटरले दोहोरो अंकको स्कोर बनाउन सकेनन्।
नेपालका कप्तान सन्दीप लामिछानेले उत्कृष्ट बलिङ गर्दै १० ओभरमा चार मेडनसहित १४ रन खर्चिएर पाँच विकेट लिए। ललित नारायण राजवंशीले ६.२ ओभरमा एक मेडनसहित २० रन खर्चिएर तीन विकेट हात पारे। करण केसीले दुई विकेट लिए।
बहराइनका कुनै पनि ब्याटरलाई खुलेर खेल्न नदिएका नेपाली बलरले लगातार दबाब बनाएपछि टोली ८७ रनमै सीमित भएको हो।
अब नेपालले ८८ रनको लक्ष्य पछ्याउँदै प्रतियोगितामा सुखद् सुरुआत गर्ने लक्ष्य राखेको छ। बहराइनका लागि पनि प्रतियोगिताको यो पहिलो खेल हो।
