काठमाडौं । अविरल वर्षासँगै आएको बाढी र पहिरोका कारण देशका विभिन्न प्रदेशका मुख्य राजमार्ग तथा सडकखण्डमा यातायात प्रभावित भएको छ। नेपाल प्रहरीले बुधबार बिहान ६ः३० बजेसम्मको अद्यावधिक विवरण सार्वजनिक गर्दै यात्रुलाई यात्रा गर्दा सतर्कता अपनाउन र सम्भव भएसम्म वैकल्पिक मार्ग प्रयोग गर्न आग्रह गरेको छ।
प्रहरीका अनुसार काठमाडौं र धादिङ जोड्ने चन्द्रागिरि नगरपालिका–२ चिसापानीमा पहिरोका कारण अवरुद्ध सडकखण्ड एकतर्फी रूपमा सञ्चालनमा आएको छ।
त्यस्तै, बीपी राजमार्गको खुर्कोट–नेपालथोक–कटुन्जेबेँसी खण्डमा सवारी सञ्चालनमा रोक लगाइएको छ। बिहान ४ बजेदेखि साँझ ६ बजेसम्म परिस्थितिको मूल्याङ्कन गरेर मात्र सवारी सञ्चालन गर्न दिइने प्रहरीले जनाएको छ।
रसुवाको उत्तरगया गाउँपालिका–५ खाल्टेमा बाढीका कारण त्रिशूली–मैलुङ–स्याफ्रुबेँसी सडकखण्ड पूर्ण रूपमा अवरुद्ध रहेको छ। प्रहरीले अन्य मुख्य राजमार्गसमेत अर्को सूचना जारी नभएसम्म पूर्ण रूपमा बन्द रहने जनाएको छ।
यसैगरी, शिवपुरी गाउँपालिका–८ अन्तर्गतको टोखा–छहरे सडकखण्डमा राति १० बजेदेखि बिहान ५ बजेसम्म रात्रिकालीन सवारी सञ्चालनमा रोक लगाइएको छ।
पृथ्वी राजमार्गअन्तर्गत धादिङको बेनीघाट रोराङ गाउँपालिका–१० स्थित ज्वाङखोला सडकखण्ड एकतर्फी रूपमा सञ्चालनमा आएको छ। यस्तै, गजुरी गाउँपालिका–२ चालिसे सडकखण्डमा पनि एकतर्फी रूपमा यातायात सञ्चालन भइरहेको प्रहरीले जनाएको छ।
प्रहरीले वर्षा, बाढी तथा पहिरोको जोखिमलाई ध्यानमा राख्दै सडकको अवस्था बुझेर मात्र यात्रा गर्न र सुरक्षाका लागि आवश्यक सावधानी अपनाउन आग्रह गरेको छ।
