बेइजिङ – अमेरिका र चीनले एकअर्काबाट आयात हुने करिब ६० अर्ब अमेरिकी डलर मूल्यका विभिन्न वस्तुमा लगाइएको भन्सार शुल्क घटाउने सहमति गरेका छन् । सहमतिअनुसार दुवै मुलुकले ३०–३० अर्ब डलर बराबरका गैरसंवेदनशील वस्तुमा तुलनात्मक रूपमा सहज भन्सार व्यवस्था लागू गर्ने भएका छन् ।
अमेरिकी व्यापार प्रतिनिधि जेमिसन ग्रियरका अनुसार नयाँ व्यवस्थाबाट चीनमा निर्यात हुने अमेरिकी वस्तुमध्ये करिब ३० प्रतिशतको बजार पहुँचमा सुधार आउनेछ ।
चीनले अमेरिकाबाट आयात हुने मकै, गहुँ, ज्वार, मासु, दुग्धजन्य पदार्थ र वनस्पति तेललगायत कृषि उत्पादनमा भन्सार घटाउने तयारी गरेको छ । यद्यपि, सोयाबिनलाई भने उक्त सूचीमा समावेश गरिएको छैन ।
त्यस्तै, चीनले अमेरिकाबाट आयात हुने माछा तथा समुद्री खाद्य पदार्थ, काठ तथा काठजन्य सामग्री, सौन्दर्य सामग्री र चिकित्सा उपकरणमा समेत भन्सार शुल्क घटाउने भएको छ ।
अमेरिकाले पनि चीनबाट आयात हुने कफी बनाउने उपकरण, टोस्टरलगायत साना घरेलु उपकरण, टेबलवेयर, कम्बल तथा ओछ्यानका कपडामा पारस्परिक रूपमा भन्सार कटौती गर्ने भएको छ ।
अमेरिकाले भन्सार घटाउने वस्तुको सूचीमा खेलौना, आतसबाजी, कृत्रिम फूल, क्रिसमस रूखमा प्रयोग हुने बत्ती तथा अन्य सजावटी सामग्री र बालबालिकाका कार सिटसमेत समावेश गरेको छ ।
अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच गत साता वासिङ्टनमा भएको यस वर्षको दोस्रो शिखर बैठकपछि व्यापारसम्बन्धी नयाँ सहमति सार्वजनिक गरिएको हो ।
व्यापार युद्धविराम थप दुई महिना लम्बिने
यसैबीच, अमेरिका र चीनबीच जारी व्यापार युद्धविरामलाई थप दुई महिना लम्ब्याउने सहमति भएको छ । चीनको वाणिज्य मन्त्रालयका अनुसार युद्धविरामको अवधि जनवरी १० सम्म कायम रहनेछ ।
मन्त्रालयले युद्धविरामको अवधि थपिएसँगै दुवै पक्षलाई आर्थिक तथा व्यापारिक विवाद समाधानका लागि भइरहेका व्यवस्थाको समीक्षा गर्न र थप सहकार्यका विषयमा छलफल अघि बढाउन समय मिल्ने जनाएको छ ।
चीनका अनुसार युद्धविरामको विस्तारले दुई देशका कम्पनीबीच व्यापार तथा सहकार्य निरन्तर अघि बढाउन तुलनात्मक रूपमा स्थिर र पूर्वानुमानयोग्य नीतिगत वातावरण तयार पार्नेछ । साथै, यस अवधिमा दुवै पक्षले बाँकी व्यापारिक तथा आर्थिक विषयमा वार्तालाई निरन्तरता दिनेछन् ।
