काठमाडौं । साउदी अरबको राजधानी रियादस्थित किङ खालिद अन्तर्राष्ट्रिय विमानस्थल र साउदी एयरलाइन्सको विमानलाई लक्षित गरी बिहीबार भएको आक्रमणमा विमानका कप्तानसहित तीन साउदी नागरिकको मृत्यु भएको छ । घटनामा विभिन्न देशका अन्य नागरिकसमेत घाइते भएका छन् ।
गत सप्ताहन्तदेखि यमनमा इरान समर्थित हुथी विद्रोहीविरुद्ध साउदी अरब र उसका सहयोगी सेनाले व्यापक सैन्य कारबाही सुरु गरेयता साउदी अरबमा भएको यो सबैभन्दा घातक आक्रमण भएको जनाइएको छ ।
साउदी अधिकारीहरूका अनुसार बिहीबार भएका दुई छुट्टाछुट्टै आक्रमणमध्ये पहिलो विमानस्थलका संरचनालाई लक्षित गरी गरिएको थियो भने दोस्रो साउदी एयरलाइन्सको विमानमाथि भएको थियो । आक्रमणमा संलग्न व्यक्तिको पहिचान सार्वजनिक गरिएको छैन । यद्यपि, हुथी विद्रोहीहरूले ब्यालेस्टिक क्षेप्यास्त्र प्रहार गरेर विमानस्थललाई निशाना बनाएको दाबी गरेका छन् ।
मृत्यु हुनेमध्ये साउदी एयरलाइन्सका कप्तान हमुद अली अलकलथामी पनि रहेको सम्बन्धित साउदी समूहले विज्ञप्तिमार्फत जनाएको छ । पछिल्लो सैन्य कारबाही सुरु भएयता साउदी राष्ट्रिय ध्वजावाहकको विमानमाथि भएको यो पहिलो पुष्टि भएको आक्रमण मानिएको छ ।
साउदी समूहका अनुसार आक्रमण हुँदा विमान जमिनमै रहेको थियो र त्यसमा क्षति पुगेको थियो । उक्त विमानमा कुनै यात्रु भने थिएनन् ।
रियादस्थित किङ खालिद अन्तर्राष्ट्रिय विमानस्थल पछिल्ला दिनमा पटकपटक आक्रमणको निशाना बन्दै आएको छ । यसै साताको सुरुआतमा भएको अर्को आक्रमणमा एक सुडानी नागरिकको मृत्यु भएको थियो ।
शुक्रबार जारी हवाई सेवासम्बन्धी वक्तव्यमा विभिन्न देशका नागरिक घाइते भएको उल्लेख छ । घाइतेहरूको अवस्था सामान्यदेखि गम्भीरसम्म रहेको जनाइएको छ ।
आक्रमण भएको केही घण्टापछि बिहीबार साँझ ६ बजेदेखि विमानस्थलको सञ्चालन सामान्य अवस्थामा फर्किएको साउदी समूहले जनाएको छ ।
यसैबीच, हुथी विद्रोहीविरुद्ध लडिरहेको साउदी नेतृत्वको गठबन्धनले क्षेत्रीय सुरक्षामा खतरा उत्पन्न गर्न विद्रोहीले प्रयोग गर्दै आएका तीनवटा रकेट प्रक्षेपण मञ्च नष्ट गरेको जनाएको छ ।
रासस/एपी
