काठमाडौं: नेपाल क्रिकेट संघ (क्यान) ले नेपाल प्रिमियर लिग (एनपीएल) लाई अन्तर्राष्ट्रिय क्रिकेट काउन्सिल (आईसीसी) बाट औपचारिक मान्यता दिलाउन निरन्तर प्रयास गरिरहेको छ।
शुक्रबार आयोजित ‘एसबीएल एनपीएल मिडिया डे’ कार्यक्रममा क्यानका सचिव पारस खड्काले मान्यताका लागि लामो समयदेखि पहल भइरहेको र छिट्टै सफलता मिल्ने अपेक्षा व्यक्त गरे। प्रतियोगितामा डिसिजन रिभ्यू सिस्टम (डीआरएस) को प्रयोगबारे सोधिएको प्रश्नमा खड्काले यो महँगो प्रविधि भएकाले सबै पक्षको सहकार्य आवश्यक रहेको बताए।
सिद्धार्थ बैंकका प्रमुख कार्यकारी अधिकृत रामेश्वर प्रसाद बस्यालले आगामी संस्करणमा डीआरएस प्रयोग हुनेमा आफू आशावादी रहेको उल्लेख गरे। एनपीएलको तेस्रो संस्करण कात्तिक ९ देखि मंसिर ५ गतेसम्म काठमाडौंमा सञ्चालन हुनेछ।
यसमा आठ टोलीहरू विराटनगर किङ्स, चितवन राइनोज, जनकपुर बोल्ट्स, कर्णाली याक्स, काठमान्डु गोर्खाज, लुम्बिनी लायन्स, पोखरा एभेन्जर्स र सुदूरपश्चिम रोयल्स सहभागी हुनेछन्। यसअघि पहिलो संस्करणको उपाधि जनकपुर बोल्ट्स र दोस्रो संस्करणको उपाधि लुम्बिनी लायन्सले जितेका थिए। कार्यक्रममा अन्तर्राष्ट्रिय अम्पायर दुर्गानाथ सुवेदीले क्रिकेटका परिवर्तित नियमहरूबारे जानकारी गराए। आईसीसीले ‘रन-आउट’ र ‘स्टम्पिङ’ सम्बन्धी नियममा संशोधन गर्दै ‘कम्प्लिट कन्ट्रोल’ को अवधारणा अघि सारेको छ।
नयाँ नियमअनुसार फिल्डरले बल पूर्ण रूपमा नियन्त्रणमा नलिएसम्म त्यसलाई आउट मानिने छैन। यसले अम्पायरहरूलाई निर्णय लिन थप सहज बनाउनेछ। साथै, बल ‘सेटल’ भयो वा भएन भन्ने निर्णयमा अम्पायरलाई थप अधिकार दिइएको छ, जसमा बल अनिवार्य रूपमा बलर वा विकेटकिपरको हातमा पुग्नुपर्ने बाध्यात्मक अवस्था हटाइएको छ।
प्रतियोगितालाई थप स्तरीय बनाउन क्यान र सहभागी टोलीहरू अन्तिम तयारीमा जुटेका छन्। लुम्बिनी लायन्सका अध्यक्ष ईश्वर जीसीले एनपीएलले छोटो समयमै खेलकुदलाई उद्योगका रूपमा स्थापित गर्न महत्त्वपूर्ण भूमिका खेलेको बताए।
