सुनसरी। सुनसरीमा भारतबाट अवैध रूपमा नेपाल भित्र्याउँदै गरिएको करिब डेढ लाख रुपैयाँ बराबरको प्रतिबन्धित सयपत्री फूल सशस्त्र प्रहरीले बरामद गरेको छ।
सुनसरीको भोक्राहा नरसिंह गाउँपालिका–६ स्थित मेहता टोलबाट सशस्त्र प्रहरी बल नेपालले उक्त फूल बरामद गरेको हो।
सोमबार बिहान करिब १०:२५ बजे सशस्त्र प्रहरी बल नेपाल, बीओपी लौकहीबाट खटिएको मोबाइल गस्ती टोलीले भारतबाट साइकलमा लोड गरी नेपालतर्फ ल्याउँदै गरिएको सयपत्री फूल फेला पारेको थियो। प्रहरी टोलीलाई देखेपछि फूल ल्याउँदै गरेका व्यक्ति साइकल र फूल छाडेर फरार भएको सशस्त्र प्रहरीले जनाएको छ।
सशस्त्र प्रहरीका अनुसार घटनास्थलबाट करिब २०० केजी (चार पोका) सयपत्री फूल बरामद गरिएको हो। बरामद फूलको अनुमानित बजार मूल्य १ लाख ४६ हजार रुपैयाँ रहेको बताइएको छ।
बरामद गरिएको फूल नियन्त्रणमा लिई आवश्यक कानुनी प्रक्रिया पूरा गर्न सेतुबन्धु भन्सार कार्यालय, सुनसरीमा बुझाइएको सशस्त्र प्रहरीले जनाएको छ।
नेपाल सरकारले स्वदेशी कृषि उत्पादनलाई प्रोत्साहन गर्दै नेपाली किसानको उत्पादनलाई संरक्षण गर्ने उद्देश्यले भारतबाट सयपत्री फूल आयातमा प्रतिबन्ध लगाएको छ। विशेषगरी तिहारजस्ता चाडपर्वका समयमा नेपाली किसानले उत्पादन गरेका फूलले बजार पाउन सकून् र भारतीय फूलको अवैध आयातका कारण स्वदेशी उत्पादनले प्रतिस्पर्धामा समस्या भोग्न नपरोस् भन्ने उद्देश्यले यस्तो व्यवस्था गरिएको हो।
भारतबाट प्रतिबन्धित फूल अवैध रूपमा भित्र्याउने गतिविधिले नेपाली पुष्प व्यवसायी तथा किसानको बजारमा प्रत्यक्ष असर पार्न सक्ने भएकाले सीमा क्षेत्रमा सशस्त्र प्रहरीले निगरानी तथा गस्तीलाई तीव्र बनाउँदै आएको छ।
