काठमाडौँ । नेपाली काँग्रेसको प्रतिनिधि सभा अन्तर्गत संसदीय दलको नेता चयन प्रक्रिया हाललाई रोकिएको छ। पूर्वनिर्धारित निर्वाचन तालिका सार्वजनिक भइसकेको अवस्थामा पनि प्रक्रिया अघि नबढ्ने निर्णय भएको हो।
एक निर्वाचन समिति सदस्यका अनुसार आगामी मिति भने हालसम्म तय गरिएको छैन। सहमतिमार्फत नेतृत्व चयन गर्ने प्रयास स्वरूप उपसभापति विश्वप्रकाश शर्माको संयोजकत्वमा सात सदस्यीय समिति गठन गरिएको थियो। उक्त समितिमा पुष्पा भुसाल, महामन्त्रीद्वय प्रदीप पौडेल र गुरुराज घिमिरे, निर्वाचन समिति संयोजक प्रकाश रसाइली ‘स्नेही’, मुना भुसाल तथा राजु कटुवाल रहेका छन्।
दलको नेतृत्व चयनलाई लिएर पार्टीभित्र शीर्ष नेताहरूबीच एकमत बन्न नसकेको देखिएको छ। सभापति गगनकुमार थापाले रसुवाबाट निर्वाचित सांसद मोहन आचार्यलाई अघि सारेका छन् भने उपसभापति विश्वप्रकाश शर्माले समानुपातिक सांसद भीष्मराज आङ्देम्बेलाई समर्थन गरेका छन्।
यसैबीच, समानुपातिक सांसद अर्जुननरसिंह केसीले सहमतिमा सहमति नजुटेमा आफू पनि प्रतिस्पर्धामा उत्रिने संकेत नेताहरूलाई दिइसकेका छन्। नेताहरूबीच आवश्यक सहमति बन्न नसक्दा आजका लागि तय गरिएको निर्वाचन प्रक्रिया अन्ततः स्थगित भएको हो।
