काठमाडौँ । सर्वोच्च अदालतले नेपाल इन्भेस्टमेन्ट मेगा बैंक लिमिटेडका प्रमुख कार्यकारी अधिकृत (सिइओ) ज्योति पाण्डेलाई हाजिरी जमानीमा रिहा गरेर अनुसन्धान प्रक्रिया अघि बढाउन आदेश दिएको छ।
न्यायाधीश सारंगा सुवेदी र शान्तिसिंह थापाको संयुक्त इजलासले एक वरिष्ठ अधिवक्ताको रोहवरमा पाण्डेलाई रिहा गरी अनुसन्धान जारी राख्न निर्देशन दिएको अदालतका सूचना अधिकारी निराजन पाण्डेले जानकारी दिएका छन्।
अदालतले पाण्डेलाई विदेश जानुपर्ने अवस्था आएमा पूर्वअनुमतिबिना मुलुक बाहिर जान नपाउने व्यवस्था गर्न पनि आदेश दिएको छ।
पाण्डेलाई हिरासतमा राखेर अनुसन्धान गर्नुपर्ने पर्याप्त आधार तत्काल नदेखिएको निष्कर्षसहित अदालतले बन्दी प्रत्यक्षीकरण आदेश जारी गरेको हो।
यसअघि पाण्डेकी पत्नी निरु दाहालले उनलाई गैरकानुनी रूपमा नियन्त्रणमा राखिएको दाबी गर्दै सर्वोच्च अदालतमा बन्दी प्रत्यक्षीकरण निवेदन दर्ता गराएकी थिइन्।
केन्द्रीय अनुसन्धान ब्युरो (सीआईबी) ले स्मार्ट टेलिकमको सम्पत्ति लिलामी प्रक्रियासँग सम्बन्धित विषयमा आपराधिक विश्वासघातलगायतका कसुरमा अनुसन्धान गर्दै पाण्डेलाई पक्राउ गरेको थियो।
