काठमाडौं। क्रिस्टियानो रोनाल्डो यस गर्मीयाममा हुने विश्वकपका लागि पोर्चुगलको प्रारम्भिक २७ सदस्यीय टोलीमा परेका छन्। यो उनको छैटौँ विश्वकप हुनेछ।
हालसम्म कुनै पनि पुरुष फुटबल खेलाडीले छ वटा विश्वकप खेलेको इतिहास छैन।
तर रोनाल्डो चोटमुक्त रहेमा आगामी केही सातामै यो कीर्तिमान बनाउनेछन्। लियोनल मेसी पनि अर्जेन्टिनाबाट टोलीमा परेमा छैटौँ विश्वकप खेल्ने सूचीमा समावेश हुनेछन्।
प्रशिक्षक रोबर्टो मार्टिनेजले मंगलबार घोषणा गरेको टोलीमा ब्रुनो फर्नान्डेस, भिटिन्हा, जोआओ नेभेस र नुनो मेन्डेसजस्ता स्टार खेलाडी पनि छन्।
टोलीमा चार गोलरक्षक राखिएका छन्, जसमा अन्तिम समयअघि एक जनालाई बाहिर गरिनेछ।
टोलीमा केही आश्चर्यजनक नाम पनि समावेश छन्। पूर्व वुल्भरह्याम्प्टन वान्डरर्स फरवार्ड गोन्कालो गेडेस, जो अहिले रियल सोसिडा मा छन्, चार वर्षपछि मार्चमा राष्ट्रिय टोलीमा फर्किएका थिए र पुनः टोलीमा स्थान बनाउन सफल भएका छन्।
यस्तै, चार खेल खेलेका मल्लोर्काका डिफेन्सिभ मिडफिल्डर सामुएल कोस्टा पनि टोलीमा परेका छन्। उनलाई जोआओ पाल्हिन्हा र मातेउस फर्नान्डेस भन्दा अघि प्राथमिकता दिइएको हो।
बायर्न म्युनिखबाट लोनमा टोटनह्याम हट्सपरमा रहेका पाल्हिन्हाले पोर्चुगलका लागि ३७ खेल खेलिसकेका छन्। वेस्ट ह्याम युनाइटेडका फर्नान्डेसले यसै वर्ष राष्ट्रिय टोलीबाट डेब्यु गरेका थिए, तर दुवैले अन्तिम टोलीमा स्थान बनाउन सकेनन्।
यस्तै बेन्फिकाका डिफेन्डर एन्टोनियो सिल्भा, फरवार्ड पाउलिन्हो, पेड्रो गोन्काल्भेस, रिकार्डो होर्टा तथा पोर्टोका युवा खेलाडी रिकार्डो मोरा टोलीबाट बाहिरिएका छन्।
संयुक्त राज्य अमेरिका, मेक्सिको र क्यानडामा हुने यस विश्वकपको उपाधि दाबेदारमध्ये पोर्चुगल पनि एक मानिएको छ।
पोर्चुगलले हालसम्म विश्वकप जित्न सकेको छैन। टोलीको उत्कृष्ट प्रदर्शन सन् १९६६ र २००६ मा सेमिफाइनलसम्म पुग्नु हो।
मार्टिनेजको टोली समूह ‘के’ मा कोलम्बिया, उज्बेकिस्तान र डीआर कङ्गो सँग परेको छ।
मार्टिनेजले गत वर्ष पोर्चुगललाई नेसन्स लिग उपाधि दिलाएका थिए, जहाँ फाइनलमा स्पेन लाई हराइएको थियो।
विश्वकप तयारीअन्तर्गत पोर्चुगलले जुन ६ मा चिली र जुन १० मा नाइजेरिया विरुद्ध घरेलु मैत्रीपूर्ण खेल खेल्नेछ।
यस्तो छ पोर्चुगलको टोलीः
