काठमाडौँ । पाकिस्तानको बलुचिस्तान प्रान्तस्थित क्वेटा क्षेत्रमा रेलमार्ग नजिक भएको शक्तिशाली विस्फोटमा कम्तीमा २० जनाको मृत्यु भएको छ भने ७० भन्दा बढी व्यक्ति घाइते भएका छन्।
स्थानीय समयअनुसार आइतबार चमन गेट आसपासको रेल ट्र्याकमा भएको विस्फोटपछि ठूलो जनधन क्षति भएको प्रारम्भिक विवरणमा उल्लेख छ। विस्फोटका कारण रेलका तीन वटा डिब्बा लिकबाट बाहिर खसेका तथा दुई वटा डिब्बा पल्टिएका थिए।
प्रत्यक्षदर्शीहरूले घटनास्थलमा विस्फोट अत्यन्त शक्तिशाली भएको बताएका छन्। विस्फोटको प्रभावले रेलमार्ग आसपास पार्क गरिएका सवारी साधनमा क्षति पुगेको तथा नजिकका आवासीय संरचनाहरूमा समेत असर परेको जनाइएको छ।
घटनापछि सुरक्षाका लागि सेना र प्रहरी परिचालन गरिएको छ। यद्यपि, हालसम्म विस्फोटको कारण तथा क्षतिबारे आधिकारिक विस्तृत विवरण सार्वजनिक गरिएको छैन।
यसैबीच रेलमन्त्री मुहम्मद हनिफ अब्बासी ले घटनाप्रति गम्भीर चिन्ता व्यक्त गर्दै कडा निन्दा गरेका छन्। रेल मन्त्रालयद्वारा जारी विवरणअनुसार क्वेटा क्यान्टबाट चमनतर्फ गइरहेको शटल रेल चमन गेट नजिकै विस्फोटको चपेटामा परेको हो।
मन्त्रालयका अनुसार विस्फोटका कारण इन्जिनसहित तीन वटा डिब्बा पटरीबाट बाहिर गएका तथा थप दुई डिब्बा पल्टिएका थिए। घटनाबारे विस्तृत अनुसन्धान भइरहेको जनाइएको छ।
