काठमाडौँ । उच्च अदालत पाटनले अखिल नेपाल फुटबल संघ (एन्फा) का पदाधिकारी तथा सदस्यहरूको विदेश भ्रमणमा रोक लगाउने निर्णय तत्काल कार्यान्वयन नगर्न अन्तरिम आदेश जारी गरेको छ।
न्यायाधीश गणेशप्रसाद बराल र तेजेन्द्रप्रसाद शर्मा सापकोटाको संयुक्त इजलासले पंकज विक्रम नेम्वाङसमेतले दायर गरेको रिटमाथि प्रारम्भिक सुनुवाइपछि उक्त आदेश दिएको हो।
आदेशअनुसार राष्ट्रिय खेलकुद परिषद् (राखेप) ले एन्फालाई निलम्बन गर्ने निर्णयका आधारमा युवा तथा खेलकुद मन्त्रालयमार्फत गृह मन्त्रालयको अध्यागमन विभागलगायत निकायमा एन्फाका अध्यक्ष, महासचिवसहित पदाधिकारी र सदस्यहरूको अन्तर्राष्ट्रिय सहभागिता तथा वैदेशिक भ्रमणमा रोक लगाउन गरिएको पत्राचार तत्काल कार्यान्वयन नगर्न भनिएको छ।
अदालतले उच्च अदालत नियमावली, २०७३ को नियम ४२९१० बमोजिम अन्तरिम आदेश जारी गर्दै एन्फाका पदाधिकारी तथा सदस्यहरूको विदेश यात्रा अवरुद्ध हुने अवस्था सिर्जना नगर्न विपक्षी निकायका नाममा निर्देशन दिएको हो।
यसअघि राष्ट्रिय खेलकुद परिषद्ले एन्फालाई निलम्बन गर्ने निर्णय गरेपछि त्यसको कार्यान्वयनका लागि सम्बन्धित सरकारी निकायहरूमा पत्राचार गरिएको थियो। उक्त निर्णयविरुद्ध दायर रिटमा अदालतले अन्तिम टुंगो नलाग्दासम्म सो पत्राचार कार्यान्वयन नगर्न आदेश दिएको हो।
