काठमाडौं । मल खरिद गर्न भारत गएका क्रममा पक्राउ परेका सर्लाहीका दुई नेपाली किसान अन्ततः थुनामुक्त भएका छन्।
सर्लाहीको बलरा–५ का सुरेशप्रसाद सिंह र नागेन्द्रप्रसाद सिंह भारतीय अदालतको आदेशअनुसार शुक्रबार धरौटीमा रिहा भएका हुन्।
सुरेशप्रसादका छोरा अविनाश सिंहका अनुसार दुवै किसान शुक्रबार साँझ रिहा भएका छन्। उनीहरूलाई लिन परिवारका सदस्यहरू भारतको डुमरवा पुगेका छन्।
यसअघि बुधबार सीतामढी जिल्लाको डुम्रा व्यवहार अदालतका सह–विशेष न्यायाधीश अखलेशकुमार झाको इजलासले दुवै किसानलाई धरौटीमा रिहा गर्न आदेश दिएको थियो। किसानहरूको पक्षबाट अधिवक्ता संजयकुमार झा र किरण चौधरीले बहस गरेका थिए।
सुरेशप्रसाद र नागेन्द्रप्रसाद १७ असारमा भारतको सीतामढी जिल्लास्थित सोनबर्षाबाट डिएपी र युरिया मल लिएर नेपाल फर्किने क्रममा भारतीय सीमा सुरक्षा बल (एसएसबी) द्वारा पक्राउ परेका थिए। त्यसको भोलिपल्ट, १८ असारमा, उनीहरूलाई जेल चलान गरिएको थियो। अब अदालतको आदेशसँगै दुवै किसान धरौटीमा रिहा भएका छन्।
