काठमाडौं, भदौ ३ । सुदूरपश्चिम प्रदेशका मुख्यमन्त्री खगराज भट्टले आज प्रदेशसभाबाट विश्वासको मत लिँदैछन्। संविधानको धारा १६८ को उपधारा (२) बमोजिम मुख्यमन्त्रीमा नियुक्त भएको ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्थाअनुसार उनले विश्वासको मत लिन लागेका हुन्।
प्रदेशसभा सचिवालयका सचिव देवबहादुर बोगटीका अनुसार मुख्यमन्त्री भट्टले मंगलबार विश्वासको मत लिने प्रयोजनका लागि बैठकको समय व्यवस्थापन गरिदिन सचिवालयमा पत्र पठाएका थिए। सोहीअनुसार आज दिउँसो १ बजे प्रदेशसभा बैठक बोलाइएको छ।
बैठकमा मुख्यमन्त्री भट्टले विश्वासको मतसम्बन्धी प्रस्ताव पेस गर्नेछन्। प्रस्तावमाथि प्रदेशसभा सदस्यहरूले धारणा राखेपछि मतदान प्रक्रिया अघि बढाइनेछ।
भट्ट गत साउन २९ गते मुख्यमन्त्रीमा नियुक्त भएका थिए। नेकपा (एमाले)को समर्थनमा मुख्यमन्त्री बनेका भट्टले विश्वासको मत पाएपछि मन्त्रिपरिषद् विस्तार गर्ने तयारी गरेका छन्।
सुदूरपश्चिममा दुई राज्यमन्त्री र सात मन्त्रीसहित १० सदस्यीय मन्त्रिपरिषद् रहने व्यवस्था छ। तर, हाल तीन मन्त्री र एक राज्यमन्त्री मात्रै जिम्मेवारीमा छन्। मुख्यमन्त्री भट्टले आन्तरिक मामिला तथा कानुन, उद्योग, पर्यटन, वन तथा वातावरण र भौतिक पूर्वाधार विकास मन्त्रालयको जिम्मेवारीसमेत सम्हालिरहेका छन्।
प्रदेशसभामा हाल मुख्यमन्त्री भट्ट नेतृत्वको नेपाली कम्युनिष्ट पार्टीका २२, नेपाली कांग्रेसका १८, नेकपा (एमाले)का ११ र राष्ट्रिय प्रजातन्त्र पार्टीका एक जना प्रदेशसभा सदस्य रहेका छन्।
