काठमाडौं । अस्ट्रेलियाको नर्थन टेरिटोरीमा जारी टप एन्ड टी–२० सिरिजअन्तर्गत नेपालले आज आफ्नो तेस्रो खेल खेल्दैछ। नेपाल एले होबार्ट हरिकेन्स एकेडेमीसँग प्रतिस्पर्धा गर्न लागेको हो।
नेपाल र होबार्टबीचको खेल नेपाली समयअनुसार दिउँसो सवा ३ बजे सुरु हुनेछ।
नेपालले सिरिजका यसअघिका दुवै खेलमा हार बेहोरेको छ। शुक्रबार भएको पहिलो खेलमा नेपाल एनटी स्ट्राइकसँग पराजित भएको थियो भने शनिबार बंगलादेशको हाई पर्फर्मेन्स टोलीसँग हार्न पुगेको थियो।
होबार्टको अवस्था पनि नेपालकै जस्तै छ। उसले खेलेका दुवै खेलमा हार बेहोरेको छ। पहिलो खेलमा भिक्टोरियासँग पराजित भएको होबार्ट दोस्रो खेलमा बंगलादेशको हाई पर्फर्मेन्स टोलीसँग हारेको थियो।
आज दुवै टोली पहिलो जितको खोजीमा मैदान उत्रिँदैछन्।
होबार्टको टोलीमा अस्ट्रेलियाका लागि खेलिसकेका बिली स्टानलेकसँगै अघिल्लो संस्करणमा खेलेका टिम वार्ड, ब्राडली होप, गेब बेल, निवेथन राधाकृष्णन, ज्याक कर्टेन, मार्कस बिन र राफ म्याकमिलन पनि छन्। स्टानलेक, टिम वार्ड, मार्कस बिन, ज्याक डोरान र राफ म्याकमिलनले बिग ब्यास लिगसमेत खेलिसकेका छन्।
अघिल्लो संस्करणमा होबार्टले ६ खेलमध्ये दुई खेलमा मात्र जित निकाल्दै १० टोलीमध्ये नवौँ स्थानमा प्रतियोगिता समाप्त गरेको थियो।
नेपालको टोली: अनिल साह (कप्तान), कुशल भुर्तेल, लोकेश बम, तृतराज दास, मयन यादव, पवन सर्राफ, दीपक डुम्रे, कुशल मल्ल, राशिद खान, नारायण जोशी, आकाश चन्द, शाहब आलम, बिपिन खत्री, युवराज खत्री र रिजन ढकाल।
होबार्ट हरिकेन्स एकेडेमीको टोली: केसी बार्टन, मार्कस बिन, गेब बेल, लाचलान क्लार्क, ज्याक डोरान, ज्याक कर्टेन, ब्राड होप, राफ म्याकमिलन, केलन मलाडे, निवेथन राधाकृष्णन, नितेश स्यामुअल, बिली स्ट्यानलेक, टिम वार्ड र टिग विलाई।
