काठमाडौं — रसुवामा आएको बाढीबाट प्रभावित क्षेत्रमा उद्धार तथा राहत कार्यलाई तीव्र बनाउन नुवाकोट, धादिङ र चितवनबाट ठूलो संख्यामा सशस्त्र प्रहरी परिचालन गरिएको छ। उद्धारका लागि सशस्त्र प्रहरी बल नेपाल नं. १९ गुल्म नुवाकोट, युएन शान्ति स्थापना तालिम शिक्षालय ककनी, धादिङ गुल्म, विपद् व्यवस्थापन बेस आदमघाट र नं. १७ गण चितवनबाट ठूलो संख्यामा सुरक्षाकर्मी प्रभावित क्षेत्रमा खटाइएको हो।
बाढीका कारण प्रभावित नागरिकको उद्धार, खोजी तथा राहत कार्यलाई प्रभावकारी बनाउन आवश्यक जनशक्ति थप गर्दै सुरक्षाकर्मी परिचालन गरिएको सशस्त्र प्रहरीले जनाएको छ। बाढीको जोखिम तल्लो तटीय क्षेत्रमा समेत बढेपछि सुरक्षा निकायले उद्धार तथा राहत कार्यसँगै जोखिममा रहेका नागरिकलाई सुरक्षित स्थानमा सार्ने कामलाई प्राथमिकता दिएको छ।
यसअघि सरकारले रसुवा बाढीपछि उद्धार तथा राहतका लागि नेपाली सेना, सशस्त्र प्रहरी बल र नेपाल प्रहरी परिचालन गरिसकेको छ। प्रभावित क्षेत्रमा थप मेडिकल टोली, एम्बुलेन्स तथा आवश्यक उद्धार सामग्रीसमेत पठाउने तयारी गरिएको छ। सम्भावित उद्धारका लागि हेलिकप्टरहरूलाई समेत स्ट्यान्डबाइमा राखिएको छ।
निजी हेलिकप्टर कम्पनीलाई समेत आवश्यक पर्दा तत्काल परिचालन गर्न सकिने गरी तयारी अवस्थामा रहन भनिएको छ। बाढी प्रभावित तथा तल्लो तटीय क्षेत्रका नागरिकलाई सुरक्षित स्थानमा जान र स्थानीय प्रशासन तथा सुरक्षा निकायको निर्देशन पालना गर्न आग्रह गरिएको छ।
