काठमाडौं– नेपाल टेलिकमले भोटेकोशी बाढीबाट प्रभावित क्षेत्रका बासिन्दाका लागि टेलिफोन, एसएमएस र इन्टरनेट सेवा निःशुल्क उपलब्ध गराउने भएको छ।
सूचना तथा सञ्चारमन्त्री डा. विक्रम तिमिल्सिनाले बाढी प्रभावित क्षेत्रमा तत्काल निःशुल्क टेलिफोन तथा इन्टरनेट सेवा उपलब्ध गराउन निर्देशन दिएपछि टेलिकमले यस्तो सुविधा ल्याएको हो।
नेपाल टेलिकमका प्रवक्ता कमल लामिछानेका अनुसार प्रभावित क्षेत्रका सेवाग्राहीलाई हालका लागि दुई दिनसम्म अनलिमिटेड भ्वाइस कल, दैनिक २ जीबी डाटा र ५० वटा एसएमएस निःशुल्क उपलब्ध गराइनेछ।
यसैबीच, टेलिकमले बाढी प्रभावित क्षेत्र तथा आसपासका सेवाग्राहीलाई सतर्कता अपनाउन आग्रह गर्दै एसएमएसमार्फत आवश्यक सूचना तथा जानकारीसमेत निरन्तर प्रवाह गरिरहेको जनाएको छ।
