पोखरा । रसुवाको भोटेकोशीमा बुधबार आएको विनाशकारी बाढीमा परी मृत्यु भएका १३५ जनाको शव त्रिशूली नदीको तटीय क्षेत्रमा फेला परेको छ । बुधबार र बिहीबार तनहुँ, गोरखा र नवलपुरका विभिन्न स्थानमा ती शव भेटिएका हुन् ।
प्रदेश प्रहरीका प्रवक्ता कृष्णप्रसाद कोइरालाका अनुसार नवलपुरमा सबैभन्दा धेरै ८१, गोरखामा ३२ र तनहुँमा २२ वटा शव फेला परेका छन् ।
तनहुँमा भेटिएका ९ वटा शव व्यवस्थापनका लागि पोखरा ल्याइएको छ । बुधबार नै शवहरू फेला परे पनि शवगृहको क्षमता सीमित हुँदा व्यवस्थापनमा समस्या भएको थियो । तनहुँमा फेला परेका २२ शवमध्ये १२ जनाको शव तनहुँ जिल्ला अस्पताल, जीपी कोइराला मेमोरियल अस्पताल र चितवनमा व्यवस्थापन गरिएको छ ।
यस्तै, गोरखामा भेटिएका १० वटा शव पनि पोखरा ल्याउने तयारी गरिएको छ । त्रिशूली नदीको तटीय क्षेत्रमा लगातार शव भेटिन थालेपछि अन्य जिल्लामा व्यवस्थापन गर्न कठिनाइ भएपछि कास्की जिल्ला प्रशासन कार्यालयले पोखरामा शव राख्ने व्यवस्था मिलाएको हो ।
कास्कीका प्रमुख जिल्ला अधिकारी कुमानसिंह गुरुङका अनुसार गृह मन्त्रालयको समन्वय तथा शव व्यवस्थापन कार्यविधिअनुसार क्षमता अभाव भएका जिल्लाबाट शव पोखरा ल्याइएको हो । चितवनमा समेत शव व्यवस्थापनमा समस्या देखिएपछि पोखराका विभिन्न अस्पतालमा क्षमताअनुसार शव राख्ने व्यवस्था गरिएको उनले बताए ।
हाल पोखरा स्वास्थ्य विज्ञान प्रतिष्ठानमा शव राख्ने व्यवस्था मिलाइएको छ । आवश्यकताअनुसार अन्य निजी अस्पतालमा समेत शव राख्ने तयारी गरिएको छ ।
पोखरामा कुल ७२ जनासम्मको शव व्यवस्थापन गर्न सकिने क्षमता भए पनि केही शव यसअघि नै रहेकाले हाल करिब ६५ जनासम्म राख्न सकिने सीडीओ गुरुङले जानकारी दिए ।
उनका अनुसार पोखरा स्वास्थ्य विज्ञान प्रतिष्ठानमा ६०, गण्डकी मेडिकल कलेजमा ४ र मणिपाल शिक्षण अस्पतालमा ८ वटा शव राख्ने व्यवस्था गरिएको छ । त्यस्तै चरक मेमोरियल अस्पताल, फेवा सिटी अस्पताल र फिस्टेल अस्पतालमा २–२ वटा शव राख्ने तयारी गरिएको छ ।
