काठमाडौं । रसुवामा बुधबार बिहान तिब्बतबाट आएको विनाशकारी बाढीमा परी नौ सयभन्दा बढी बस तथा ट्रक बेपत्ता भएको प्रारम्भिक विवरण सार्वजनिक भएको छ । नेपाल यातायात व्यवसायी राष्ट्रिय महासंघका अनुसार बाढीमा परी चार सयभन्दा बढी यात्रुवाहक सवारीसाधन बेपत्ता भएका छन् ।
महासंघमा विभिन्न यातायात कम्पनीबाट हालसम्म २१९ वटा यात्रुवाहक गाडी बेपत्ता भएको विवरण प्राप्त भएको छ । अन्य कम्पनीबाट पनि विवरण संकलन भइरहेकाले यो संख्या अझ बढ्न सक्ने महासंघका महासचिव तथा प्रवक्ता टेकनाथ गौतमले बताएका छन् ।
उनका अनुसार पर्यटन, तीर्थयात्रु तथा सर्वसाधारण बोकेर रसुवा, नुवाकोटका विभिन्न गन्तव्यतर्फ गइरहेका चार सयभन्दा बढी यात्रुवाहक गाडी बाढीमा परेको प्रारम्भिक अनुमान छ । मानसरोवर जाने तीर्थयात्रु बोकेका मात्रै करिब ४० वटा गाडी बेपत्ता भएका छन् । त्यस्तै, ६० भन्दा बढी माइक्रोबस पनि सम्पर्कविहीन छन् ।
बाढीमा परी चार सयभन्दा बढी चालक तथा सहचालकसमेत सम्पर्कविहीन रहेको महासंघले जनाएको छ । ती सवारीसाधनमा कति यात्रु सवार थिए भन्ने यकिन विवरण भने अझै प्राप्त हुन सकेको छैन।
सवारीसाधनको क्षति तथा बेपत्ताको विवरण संकलन गर्न महासंघले कोषाध्यक्ष राजेन्द्र आचार्यको संयोजकत्वमा पाँच सदस्यीय समिति गठन गरेको छ । समितिका सदस्यमा श्री श्रेष्ठ, दिलबहादुर श्रेष्ठ, नरबहादुर राना र सुवन गिरी रहेका छन् । समितिले शुक्रबारदेखि प्रभावित क्षेत्रमा पुगेर क्षतिको विवरण संकलन तथा बेपत्ता सवारीसाधनको खोजी गर्ने महासचिव गौतमले बताएका छन् ।
यस्तै, बाढीमा परी पाँच सयभन्दा बढी मालवाहक ट्रकसमेत बेपत्ता भएको प्रारम्भिक अनुमान छ । व्यवसायीका अनुसार चीनबाट सामान ल्याउन गएका मात्रै करिब तीन सय ट्रक बाढीमा परेका छन् । सीमाक्षेत्रमा भन्सार पासका लागि रोकिएका करिब दुई सय मालवाहक गाडी पनि बाढीमा बेपत्ता भएको बताइएको छ ।
महासंघका अनुसार बस र ट्रक गरी कुल नौ सयभन्दा बढी सवारीसाधन बेपत्ता भएका छन् भने चार सयभन्दा बढी चालक तथा सहचालक सम्पर्कबाहिर रहेका छन् । थप विवरण संकलन भइरहेकाले क्षतिको वास्तविक आँकडा अझ बढ्न सक्ने जनाइएको छ ।
