काठमाडौं । रसुवाको भोटेकोशी नदीमा आएको भीषण बाढीको असर भारतको सीमावर्ती क्षेत्रमा समेत देखिन थालेको छ।
बीबीसी हिन्दीका अनुसार भारतको उत्तर प्रदेशस्थित महराजगञ्जमा गण्डक (नारायणी) नदीबाट चार तथा कुशीनगरमा तीन गरी सात शव फेला परेका छन्। फेला परेका शवमध्ये पाँच महिला र दुई पुरुषका छन्।
नेपालमा आएको विनाशकारी बाढीका क्रममा नदीमा बगेका शव तीव्र बहावसँगै भारततर्फ पुगेको हुन सक्ने आशंका गरिएको छ।
सशस्त्र सीमा बल (एसएसबी) को उद्धार टोलीले नदीमा निगरानी गर्ने क्रममा शवहरू बगिरहेको देखेपछि मोटरबोटको सहयोगमा बाहिर निकालेको जनाइएको छ।
उद्धार गरिएका शवलाई महराजगञ्ज र कुशीनगर जिल्ला मुख्यालय पठाइएको छ। हालसम्म शवको पहिचान खुल्न सकेको छैन।
