रसुवा । नेपाल–चीन सीमावर्ती क्षेत्रअन्तर्गत तिब्बततर्फ पहिरोका कारण थुनिएको कृत्रिम ताल (ड्याम) पुनः फुटेको जानकारी प्राप्त भएपछि नेपालतर्फका नदी तटीय क्षेत्रमा उच्च सतर्कता अपनाइएको छ।
चीनको जिरोङ नाकाभन्दा माथिल्लो क्षेत्रमा पहिरोका कारण बनेको ड्याम फुटेर ठूलो परिमाणमा पानी तल्लो क्षेत्रमा बग्न थालेपछि भोटेकोशी र त्रिशूली नदी आसपास बाढीको जोखिम बढेको हो। सम्भावित जोखिमलाई मध्यनजर गर्दै नेपाल प्रहरीले सार्वजनिक सूचना जारी गरी नदी किनार तथा जोखिमपूर्ण क्षेत्रमा रहेका नागरिकलाई सतर्क रहन आग्रह गरेको छ।
रसुवामा वस्तुस्थिति नियन्त्रण तथा समन्वयका लागि खटिएका एसएसपी दीप शमशेर जबराले ड्याम पुनः फुटेको सूचना प्राप्त भएसँगै उद्धार तथा राहतमा खटिएका सुरक्षाकर्मी, उद्धारकर्मी र सर्वसाधारणलाई तत्काल सुरक्षित स्थानमा जान निर्देशन दिइएको बताए।
बुधबार आएको भीषण पहिरोपछि बनेको उक्त कृत्रिम तालमा पानीको सतह बढेर ओभरफ्लो भइरहेको थियो। त्यसैबीच ड्याम पुनः फुटेपछि भोटेकोशी हुँदै त्रिशूली नदीमा आकस्मिक रूपमा ठूलो बाढी आउन सक्ने जोखिम बढेको प्रहरीले जनाएको छ।
प्रहरीले भोटेकोशी र त्रिशूली नदी किनारमा रहेका बस्ती तथा जोखिमयुक्त क्षेत्रका नागरिकलाई तत्काल सुरक्षित स्थानमा सर्न र नदीको बहाव बढेको अवस्थामा नदी किनारमा नजान आग्रह गरेको छ।
