रसुवा । रसुवास्थित त्रिशूली–३ ‘ए’ जलविद्युत् आयोजनाको सुरुङमा फसेका व्यक्तिको उद्धारका क्रममा उद्धार टोली एक जनासम्म पुग्न सफल भएको रिपोर्ट आएको छ। यससँगै सुरुङभित्र फसेकाहरूको सुरक्षित उद्धार हुने आशा बढेको छ।
शनिबार उद्धारका लागि गरिएको पहिलो नियन्त्रित विस्फोट सफल भएको छ। विस्फोटपछि सुरुङको प्रवेशमार्ग खोल्न दुईवटा एक्स्काभेटर परिचालन गरी भग्नावशेष तथा जमेको लेदो हटाउने काम भइरहेको छ।
सुरुङभित्र फसेकाहरूको उद्धारका लागि नेपाली सेना, सशस्त्र प्रहरी बल नेपाल र नेपाल प्रहरीको संयुक्त टोली निरन्तर खटिएको छ। टोलीले ड्रिलिङ मेसिन, एक्स्काभेटरलगायतका उपकरण प्रयोग गरी सुरुङको बाहिरी भाग पहिचान गर्नुका साथै प्रवेशमार्ग खोल्ने प्रयास गरिरहेको छ।
उद्धारमा संलग्न सुरक्षाकर्मीहरूले सुरुङमा जमेको लेदो र भग्नावशेष पन्छाउँदै भित्रसम्म पुग्ने बाटो बनाइरहेका छन्। शनिबार बिहानदेखि उद्धार कार्यलाई थप तीव्र पारिएको हो।
सुरुङभित्र मानिस फसेको जानकारी पाएपछि सरकारले प्राथमिकताका साथ उद्धार टोली परिचालन गरेको थियो। नेपाली सेनाका ६२ जना तथा सशस्त्र प्रहरी र नेपाल प्रहरीका २० जनासहित ८२ जनाको संयुक्त टोली रातिदेखि नै उद्धारमा खटिएको छ।
पहिलो नियन्त्रित विस्फोटपछि एक्स्काभेटरमार्फत थप भग्नावशेष हटाउने तथा सुरुङको प्रवेशमार्ग फराकिलो बनाउने काम भइरहेको छ। सुरुङभित्रको वास्तविक अवस्था पत्ता लगाउन ड्रिलिङ मेसिन तथा अन्य प्राविधिक उपकरणसमेत प्रयोग गरिएको छ।
यसैबीच, उद्धारमा सहयोग गर्न नेपाल आएको भारतीय टोली पनि त्रिशूली पुगेको छ। भारतीय टोलीले हेलिकोप्टरमार्फत चिलिमे र लाङटाङ क्षेत्रमा प्रारम्भिक हवाई अनुगमन गरेको छ। आवश्यकताअनुसार उक्त टोलीलाई थप उद्धार कार्यमा परिचालन गर्ने तयारी गरिएको छ।
केही दिनअघि रसुवामा आएको विनाशकारी बाढीका कारण जलविद्युत् आयोजनाका संरचना तथा सुरुङ क्षेत्रमा ठूलो क्षति पुगेको छ। प्रतिकूल मौसम, सुरुङभित्र जमेको लेदो र ठूलो मात्रामा थुप्रिएको भग्नावशेषका कारण उद्धार कार्य चुनौतीपूर्ण बनेको छ।
तर, उद्धार टोली सुरुङभित्र एक जनासम्म पुग्न सकेको रिपोर्ट आएपछि फसेका अन्य व्यक्तिलाई समेत सुरक्षित रूपमा बाहिर निकाल्न सकिने आशा बढेको छ। उद्धार टोलीले सुरुङभित्र रहेका सबै व्यक्तिको खोजी तथा उद्धारलाई निरन्तरता दिएको छ।
