काठमाडौं । नेपाल विद्युत् प्राधिकरणले त्रिशूली थ्री-ए आयोजनाको सुरुङमा फसेका कर्मचारीको उद्धारका लागि पाँच वटा ड्रिल (प्वाल) बनाएको छ। ती प्वालबाट सुरुङभित्र हावा पठाउनुका साथै भित्रको अवस्थाबारे जानकारी लिने प्रयास भइरहेको छ।
सुरुङ विज्ञ तथा सांसद् श्रीराम न्यौपानेका अनुसार उद्धार टोलीले ड्रिल गर्ने र सुरुङभित्रको अवस्था बुझ्ने काम जारी राखेको छ। उनी उद्धारस्थलमै बसेर उक्त प्रक्रियाको नेतृत्व गरिरहेका छन्।
न्यौपानेका अनुसार एक्स्काभेटर प्रयोग गरी सुरुङको स्ल्याब पत्ता लगाउने प्रयास भइरहेको छ। तर, खन्ने क्रममा चट्टान भेटिएपछि उद्धार कार्य केही जटिल बनेको छ। चट्टानको मात्रा कम भएमा स्ल्याब छिट्टै पत्ता लाग्ने र आवश्यक परे विस्फोट गराएर सुरुङभित्र प्रवेश गर्ने विकल्पमा समेत काम भइरहेको उनले बताए।
उद्धारमा नेपाली सेना, नेपाल विद्युत् प्राधिकरण तथा विभिन्न सुरुङ विज्ञहरूको टोली परिचालित छ।
प्राधिकरणका इन्जिनियर सुरज दाहालका अनुसार एक–दुई जना व्यक्ति प्रवेश गर्न सक्ने गरी प्वाल बनाउन सके नेपाली सेनाका उद्धार विज्ञलाई सुरुङभित्र पठाएर अवस्था निरीक्षण गरिनेछ। सुरुङभित्र लेदो नछिरेको पुष्टि भए थप उद्धारकर्तालाई प्रवेश गराई फसेका कर्मचारीलाई एक–एक गर्दै बाहिर निकाल्ने तयारी रहेको उनले बताए।
प्राधिकरणका अनुसार आयोजनाको सुरुङमा फसेका कर्मचारीको उद्धार कार्य बाढी आएको दुई दिनपछि शुक्रबारबाट मात्रै सुरु भएको हो। पाँच दिनसम्म पनि सुरुङ छिचोलेर फसेका कर्मचारीसम्म पुग्न नसकेपछि उनीहरूको अवस्थाबारे चिन्ता बढ्दै गएको अधिकारीहरूले बताएका छन्।
प्राधिकरणका अनुसार आयोजनाको भूमिगत विद्युत्गृहमा ओभरहलिङको काम गरिरहेका करिब ४०–४२ जना उच्च विज्ञसहितका प्राविधिक जनशक्ति सुरुङभित्र फसेको अनुमान गरिएको छ।
