काठमाडौं– गत भदौ १० गते रसुवाको भोटेकोशीमा आएको बाढीका कारण थुनिएको त्रिशूली–३ ‘ए’ जलविद्युत् आयोजनाको सुरुङमा फसेकाहरूको उद्धारका क्रममा शुक्रबार उद्धारकर्मी र सुरुङभित्र रहेका व्यक्तिबीच संवाद भएको छ।
उद्धारमा खटिएको टोलीले सुरुङभित्रबाट एकभन्दा बढी व्यक्तिको आवाज सुनिएको पुष्टि गरेको छ। उद्धारकर्मीले सुरुङभित्र रहेका व्यक्तिहरूलाई ‘नआत्तिनुहोस्, हामी उद्धार गर्दैछौँ’ भनेपछि भित्रबाट ‘हुन्छ’ भन्ने प्रतिक्रिया आएको बताइएको छ।
सुरुङभित्र मानिससँग प्रत्यक्ष संवाद हुनुलाई उद्धार कार्यमा महत्वपूर्ण र आशाजनक संकेतका रूपमा लिइएको छ।
नेपाली सेना र सशस्त्र प्रहरीसहितको उद्धार टोली सुरुङभित्र प्रवेश गरी खोज तथा उद्धार कार्यलाई तीव्र बनाइरहेको छ। सुरुङभित्र फसेकाहरूको अवस्थाबारे थप जानकारी लिन उद्धारकर्मीले निरन्तर प्रयास गरिरहेका छन्।
यसअघि राष्ट्रिय स्वतन्त्र पार्टीका सांसद तथा ऊर्जा विभाग प्रमुख श्रीराम न्यौपानेले उद्धारमा खटिएको नेपाली सेनाको टोलीले सुरुङभित्रबाट मानिस बोलेको आवाज सुनेको जानकारी प्राप्त भएको बताएका थिए।
न्यौपाने बिहीबार साँझसम्म इन्जिनियरका रूपमा आयोजनास्थलमै रहेर खोज तथा उद्धार कार्यमा संलग्न थिए। उनले नेपाली सेना, सशस्त्र प्रहरी, प्राविधिक टोली तथा उद्धारमा खटिएका सम्पूर्ण जनशक्तिप्रति सम्मान व्यक्त गर्दै सुरुङभित्र फसेकाहरूको सकुशल उद्धार हुने विश्वास व्यक्त गरेका छन्।
त्रिशूली–३ ‘ए’ जलविद्युत् आयोजनाको सुरुङमा फसेकाहरूको उद्धारका लागि नौ दिनदेखि निरन्तर खोज तथा उद्धार अभियान सञ्चालन भइरहेको छ।
