काठमाडौं । प्रधानमन्त्री बालेन शाहले कृष्ण जन्माष्टमीका अवसरमा बालबालिकालाई सम्बोधन गर्दै सुरक्षित एवं उज्यालो भविष्य निर्माणका लागि सबै एकजुट भएर अघि बढ्नुपर्ने बताएका छन् ।
रसुवाको भोटेकोशी क्षेत्रमा आएको विनाशकारी बाढीबाट प्रभावित बालबालिकाप्रति सहानुभूति व्यक्त गर्दै प्रधानमन्त्री शाहले विपद्बाट सिकेर भविष्यमा स–साना कुरादेखि नै पूर्वतयारी गर्नुपर्नेमा जोड दिएका छन् ।
उनले बाढी प्रभावित क्षेत्रमा बालबालिका, वृद्धवृद्धा, गर्भवती, सुत्केरी, अपाङ्गता भएका व्यक्ति तथा गम्भीर घाइतेलाई उद्धारमा प्राथमिकता दिइएको उल्लेख गर्दै सुरक्षित र सहज बसोबासको व्यवस्था गरिने बताए ।
प्रधानमन्त्री शाहले जलवायु परिवर्तनका कारण हिमाली क्षेत्रमा विपद्को जोखिम बढ्दै गएको भन्दै बालबालिकालाई समेत विपद् जोखिम न्यूनीकरणका विषयमा सचेत हुन आग्रह गरेका छन् ।
उनले घरमा आवश्यक सामग्रीसहितको ‘विपद् झोला’ तयार राख्न, सानैदेखि बचत गर्ने बानी बसाल्न तथा जलवायु परिवर्तन र त्यसको प्रभावबारे अध्ययन एवं छलफल गर्न बालबालिकालाई सुझाव दिएका छन् ।
प्रधानमन्त्री शाहका अनुसार विपद्को समयमा नेपाली सेना, नेपाल प्रहरी, सशस्त्र प्रहरी बल नेपाललगायतका सुरक्षा निकाय तथा विभिन्न विज्ञ टोलीले जोखिम मोलेर उद्धारमा महत्वपूर्ण भूमिका निर्वाह गरेका छन् । उनले उनीहरूप्रति आभार व्यक्त गर्दै विदेशमा रहेका नेपाली, मित्रराष्ट्र तथा विकास साझेदार संस्थाले गरेको सहयोगका लागि पनि धन्यवाद दिएका छन् ।
उनले विपद्को समयमा निराश नभई धैर्य, कर्तव्य र एकताका साथ अघि बढ्नुपर्ने उल्लेख गर्दै सुरक्षित र उज्यालो नेपालको निर्माणमा सबै मिलेर जुट्न आह्वान गरेका छन् ।
प्रधानमन्त्री शाहले भनेका छन्, “विपद्को भाषा विनाश र दुःख हो, तर यस्तो संकटका बेला हामीले एकता, सद्भाव र भ्रातृत्वको भावना मनमा राखेर काम गर्नुपर्छ।”
