रसुवा । भोटेकोशी नदीमा आएको विनाशकारी बाढीमा परी बेपत्ता भएकामध्ये हालसम्म १ हजार ३४४ जनाको शव फेला परेको छ। नेपाल प्रहरीले सार्वजनिक गरेको पछिल्लो विवरणअनुसार अझै ४ हजार ८ सय ९८ जना सम्पर्कविहीन छन्।
प्रहरीका अनुसार फेला परेका शवमध्ये ४८९ पुरुष, २६९ महिला, ५२ बालक र ३३ बालिका रहेका छन्। यस्तै, ५०१ वटा शवका आंशिक अंग फेला परेका छन्। ती अंगहरूको पहिचान हुन बाँकी रहेको प्रहरीले जनाएको छ।
बेपत्तामध्ये २ हजार ९३० जना नेपाली र ६१८ जना विदेशी नागरिक रहेका छन्। नेपाली बेपत्तामा २ हजार ४४८ पुरुष र ४८२ महिला छन्। थप १ हजार ३५० जनाको बेपत्ता भएको जानकारी फोनमार्फत प्राप्त भएको प्रहरीले जनाएको छ।
बाढी प्रभावित क्षेत्रबाट हालसम्म ८ हजार ६३१ जनाको जीवित उद्धार गरिएको छ। उद्धार गरिएकामध्ये ७ हजार ३८७ नेपाली र १ हजार २४४ विदेशी नागरिक छन्। बाढीका कारण विस्थापित ३ हजार ६५५ जनालाई विभिन्न होल्डिङ सेन्टरमा राखिएको छ।
खोज तथा उद्धारका लागि ७ हजार २१२ जना प्रहरी जनशक्ति परिचालन गरिएको छ। उद्धारकै क्रममा ६५ प्रहरी कर्मचारी प्रभावित भएका छन् भने २५ जना प्रहरी अझै सम्पर्कविहीन रहेको प्रहरीले जनाएको छ।
फेला परेका शवमध्ये १ हजार ३० वटालाई जमिनमा गाडेर व्यवस्थापन गरिएको छ। मृतकको पहिचानका लागि डीएनए नमुना संकलनलाई समेत तीव्रता दिइएको छ। हालसम्म १ हजार २६० मृतक र ९७२ जना आफन्त गरी २ हजार २३२ जनाको डीएनए नमुना संकलन गरिएको प्रहरीले जनाएको छ।
पहिचान हुन नसकेका १ हजार २७० जनाको विवरण वेबसाइटमा सार्वजनिक गरिएको छ।
