कञ्चनपुर । जल तथा मौसम विज्ञान विभागको मौसम पूर्वानुमान महाशाखाले कञ्चनपुरका दोधारा चाँदनी, भीमदत्त र बेदकोट नगरपालिकामा भारी वर्षाको सम्भावना रहेकाले सतर्कता अपनाउन आग्रह गरेको छ ।
महाशाखाले मौसम पूर्वानुमान बुलेटिन जारी गर्दै ती तीन पालिकामा भारी वर्षा हुनसक्ने भएकाले स्थानीय तह तथा सरोकारवाला निकायलाई तयारी अवस्थामा रहन आग्रह गरेको हो । भारी वर्षाका कारण स–साना नदी तथा खोलामा पानीको बहाव उल्लेख्य बढ्न सक्ने जोखिम रहेको महाशाखाले जनाएको छ ।
बेदकोट नगरपालिकाका विपद् सम्पर्क व्यक्ति सुनिल चन्दले नगरपालिका पूर्वतयारी अवस्थामा रहेको जानकारी दिए । उनका अनुसार नगर प्रहरी तथा वडाध्यक्षलाई तयारी अवस्थामा रहन निर्देशन दिइएको छ भने आवश्यक सामग्रीसमेत तयारी अवस्थामा राखिएको छ ।
त्यस्तै, दोधारा चाँदनी नगरपालिकाका विपद् सम्पर्क व्यक्ति अमृत विकले पनि नगरपालिका पूर्वतयारी अवस्थामा रहेको बताए । महाशाखाले सरोकारवाला निकायलाई नदी तथा खोलाको निगरानी बढाउन, स्थानीय तह र समुदायलाई सम्भावित जोखिमबारे जानकारी गराउन तथा आवश्यक तयारी थाल्न आग्रह गरेको छ ।
कञ्चनपुरमा आज बिहानैदेखि अविरल वर्षा भइरहेको छ । महाकाली नदीको जलसतह सतर्कता तह पार गरेपछि भारतीय पक्षले नेपाल–भारत जोड्ने वनवासास्थित शारदा ब्यारेजमा आवागमनमा रोक लगाएको छ ।
इलाका प्रहरी कार्यालय गड्डाचौकीका प्रमुख जीवन गुरुङका अनुसार साँझ ५ बजेको मापनमा महाकाली नदीमा पानीको बहाव प्रतिसेकेन्ड १ लाख ३३ हजार ८८८ क्युसेक पुगेको छ ।
महाकाली नदीमा पानीको बहाव १ लाख क्युसेक नाघेपछि सुरक्षाका कारण शारदा ब्यारेजमा चारपाङ्ग्रे सवारीसाधन सञ्चालनमा रोक लगाउने गरिएको छ ।
