काठमाडौँ । नवनियुक्त उद्योग, वाणिज्य तथा आपूर्तिमन्त्रीले आफ्नो कार्यकालको पहिलो प्राथमिकता आम नागरिकलाई आवश्यक पर्ने ग्यासको सहज आपूर्ति सुनिश्चित गर्नु रहेको बताएका छन् ।
बिहीबार पद तथा गोपनीयताको शपथ ग्रहण गरेलगत्तै मन्त्रालय पुगेका मन्त्रीले पत्रकारहरूसँग कुरा गर्दै जनताको आवश्यकतालाई आफूले उच्च प्राथमिकतामा राखेर काम गर्ने बताए ।
शपथ ग्रहणपछि ग्यास अभावबारे सोधिएको प्रश्नमा उनले भने, “जनतालाई जति आवश्यक छ, त्यो दिनैपर्छ । यस विषयमा छलफल गरेर आवश्यक कदम चाल्नेछौँ ।”
मन्त्रीले मन्त्रालयको जिम्मेवारी सम्हालेपछि सर्वप्रथम निवर्तमान मन्त्री गौरीकुमारी यादवसँग विगतमा भएका कामकारबाही र बाँकी रहेका कार्ययोजनाबारे जानकारी लिने बताए । त्यसपछि प्राप्त विवरण र मन्त्रालयको अवस्थाका आधारमा आगामी कार्ययोजना अघि बढाउने उनको भनाइ छ ।
मन्त्रालयमा पुगेर पदभार ग्रहण गर्ने क्रममा नवनियुक्त मन्त्रीले शिष्टता र श्रद्धा प्रदर्शनसमेत गरेका थिए । उनले मन्त्रालयको ढोकामै आफ्ना जुत्ता खोलेर कार्यकक्षमा प्रवेश गरेका थिए । त्यसपछि कार्यकक्षमा राखिएको नेपालको राष्ट्रिय झण्डालाई निहुरिएर ढोग्दै पदभार ग्रहण गरेका हुन् ।
निवर्तमान मन्त्री गौरीकुमारी यादवले राजीनामा दिएपछि सुनसरी निर्वाचन क्षेत्र नम्बर ४ बाट निर्वाचित साहलाई मन्त्रिपरिषद्मा उद्योग, वाणिज्य तथा आपूर्तिमन्त्रीका रूपमा नियुक्त गरिएको हो ।
