कात्तिक ३, काठमाडौं ।
जनता समाजवादी पार्टीको केन्द्रीय कार्यकारिणी समिति बैठक सोमबार बिहान ११ बजेबाट सुरु हुने भएको छ ।
जसपा नेता केशव झाका अनुसार बैठक मंगलबार पनि बस्नेछ । बैठकमा विधान संशोधन, नियमावली निर्माण, केन्द्रीय समितिको विस्तार तथा कार्यविभाजन, कार्यकारिणी समिति सदस्यको कार्यविभाजन, संघीय परिषद्को गठन, समायोजन लगायतका एजेन्डा रहेको झाले बताए ।
जसपाको केन्द्रीय समितिको आकार ८ सय १ हुने र संघीय परिषद् १ हजार २ सय १ हुने तय भएको छ ।
जसपाको यो दोस्रो केन्द्रीय कार्यकारिणी समितिको बैठक हो । यसअघि गत साउन २१ देखि २४ गतेसम्म पहिलो बैठक बसेको थियो । त्यतिबेला बैठक बसेको बालकुमारीस्थित तुलसीलाल प्रतिष्ठानमै यो बैठक पनि बस्ने बताइएको छ ।
जसपाको केन्द्रीय कार्यकारिणी समितिमा ५१ जना सदस्य रहेका छन् ।
गत बैशाख १० गते तत्कालीन राष्ट्रिय जनता पार्टी र समाजवादी पार्टीबीच एकता भएर जनता समाजवादी गठन भएको थियो । एकता भए पनि समायोजन र कार्यविभाजन लगायतका काम सकिएको छैन ।
