काठमाडौँ । नेपाली कांग्रेसको इतर समूहले पार्टीको महाधिवेशन तथा तल्लो तहका अधिवेशनहरू सम्पन्न गर्न विभिन्न जिल्लामा केन्द्रीय प्रतिनिधि खटाएको छ।
समूहले पाँचथरमा सूर्यकुमार दाहाल, झापामा महीन्द्रा कुमारी लिम्बु, मोरङमा भीम पराजुली र काठमाडौंमा कल्याणी रिजाललगायतका नेताहरूलाई अधिवेशन सम्पन्न गराउने जिम्मेवारी दिएको हो।
सचिवालय समन्वय समितिका संयोजक दीपकप्रसाद कुइँकेलले जारी गरेको विज्ञप्तिमा महाधिवेशनलाई सफल र व्यवस्थित रूपमा सम्पन्न गर्न सबै पक्षसँग सहयोग र समन्वयका लागि आग्रह गरिएको छ।
विज्ञप्तिमा भनिएको छ, ‘सबै तहका जिम्मेवार साथीहरूलाई आवश्यक सहयोगका लागि हार्दिक अनुरोध गर्दछौं।’ साथै, कांग्रेसका क्रियाशील सदस्य तथा शुभेच्छुकहरूलाई अधिवेशन प्रक्रियामा सक्रिय सहभागिता जनाउन अपिल गरिएको छ।
यसअघि भदौ १७ र १८ गते बसेको महाधिवेशन तयारी समितिको बैठकले असोज १५ गतेदेखि वडा अधिवेशन सुरु गर्ने निर्णय गरेको थियो। अधिवेशनलाई व्यवस्थित बनाउन विभिन्न तहमा तयारी समितिहरू गठन गर्ने समयसीमासमेत निर्धारण गरिएको छ।
निर्णयअनुसार जिल्ला, संघीय निर्वाचन क्षेत्र, प्रदेशसभा निर्वाचन क्षेत्र, पालिका र वडा अधिवेशन तयारी समितिहरू असोज ३ गतेभित्र गठन गरिसक्नुपर्नेछ।
